परळीत कुलर कारखान्याला आग

परळी : येथील औद्योगिक वसाहतीमधील कुलर कारखान्याला बुधवारी सायंकाळी ६ वाजेच्या सुमारास आग लागल्याने कुलर बनविण्यासाठी लागणारे साहित्य जळून मोठे नुकसान झाले. अचानक आगडोंब उसळल्याने नागरिकांची प्रचंड गर्दी केली होती. आग आटोक्यात आणण्यासाठी नगरपालिका, वैद्यनाथ साखर कारखाना तसेच परळी औष्णिक विद्युत केंद्र येथील अग्निशामक दल दाखल झाले असून आग विझविण्यासाठी युद्धपातळीवर प्रयत्न चालू आहेत.

येथील व्यापारी सुनील सोळंके यांचे शहरातील वैद्यनाथ औद्योगिक वसाहतीमध्ये साई एअर कुलर इंडस्ट्रीज नामक कुलरचा कारखाना आहे. बुधवारी सायंकाळी अचानक आग लागताच कामगारांनी आरडाओरड सुरू करून मदतीसाठी शेजाऱ्यांना हाक दिली. आगीची माहिती कळताच परळी न. प. चे गटनेते वाल्मीक कराड, मुख्याधिकारी अरविंद मुंडे,नगरसेवक चंदुलाल बियाणी ,राजा खान, भाजपाचे शहराध्यक्ष जुगलकिशोर लोहिया, नरसिंग सिरसाठ, यांनी धाव घेतली. या कुलर इंडस्ट्रीज शेजारीच कपाट कारखाना व ऑईल मिल आहे. आग विझविण्यासाठी नागिरकांसह औद्योगिक वसाहतीतील सर्व उद्योजकही मदतीला धावून आले. ही आग कशामुळे लागली याचे कारण सायंकाळपर्यंत स्पष्ट झाले नव्हते.