कोरोना लसीकरण; ज्येष्ठांनो घरबसल्या घ्या अपॉइंटमेंट

बीड : कोरोना लसीचा तुटवडा असला तरी लस आल्यावर गोंधळ उडू नये, यासाठी बीड आरोग्य विभागाने नियोजन केले आहे. एक वेब लिंक व ॲप तयार करून घरबसल्या ऑनलाईन अपॉइंटमेंट घेण्याची सुविधा ४५ वर्षांवरील लाभार्थ्यांसाठी उपलब्ध करून दिली आहे. यामुळे काही प्रमाणात दिलासा मिळाला असला तरी लस येण्याची प्रतीक्षा कायम आहे.

जिल्ह्यात सध्या कोरोना लसीचा पुरवठा बंद आहे. केवळ दुसरा डोस असणाऱ्या लोकांना लस दिली जात आहे. आतापर्यंत जिल्ह्यात ३ लाख लोकांना लस दिली असली तरी अद्यापही लाखो लोक यापासून वंचित आहेत. शासनाकडून लसीचा मुबलक पुरवठा होत नसल्याने नागरिकांना प्रतीक्षा करावी लागत आहे. असे असले तरी काही दिवसांनी लसीचा पुरवठा होणार आहे. यावेळी नागरिकांची गर्दी होऊ नये, यासाठी आराेग्य विभागाने एक वेब लिंक तयार करून घरबसल्या ऑनलाईन अपॉइंटमेंट घेण्याची सुविधा उपलब्ध केली आहे. यात वेळ, टोकन क्रमांक आणि लसीकरण केंद्राची माहिती मिळणार आहे. जिल्हाधिकारी रवींद्र जगताप, मुख्य कार्यकारी अधिकारी अजित कुंभार, यांच्या मार्गदर्शनाखाली जिल्हा आरोग्य अधिकारी डॉ.आर.बी. पवार यांनी याचे नियोजन केले आहे.

अशी मिळवा ऑनलाईन अपॉइंटमेंट

सुरुवातीला गुगलवर जाऊन http://ezee.live/Beed Covid 19 Registration ही लिंक ओपन करा. त्यानंतर आपले पूर्ण नाव, वय, मोबाईल क्रमांक, लिंग, पत्ता अचूक टाकावा. नंतर लसीकरण केंद्र निवडावे. आपण पहिला की दुसरा डोस घेणार आहेत, यावर क्लिक करावे. नंतर शब्द व अंकाचा कोड खालील बॉक्समध्ये टाकावा. शेवटी पुन्हा नोंदणी करणाऱ्याचा मोबाईल क्रमांक टाकून सबमीट करावे. नंतर ‘डाटा सबमिटेड सक्सेसफुली’ असे समोर दिसेल. त्याचा स्क्रीनशॉट अथवा फोटो काढून जपून ठेवावा. यात टोकन क्रमांक आणि लसीकरण केंद्राचे नाव असेल. तसेच नीडली ॲप डाऊनलोड केले असल्यास लसीचे स्टेटस समजणार आहे. लस उपब्ध होताच मेसेज येईल.

१८ ते ४४ वयाेगटासाठी ही सुविधा नाही

ही नोंदणी सुविधा केवळ ४५ वर्षांवरील लोकांसाठी आहे. १८ ते ४४ वयोगटातील लोकांना आरोग्य सेतू अथवा कोविन ॲपद्वारेच ऑनलाईन अपॉइटमेंट घ्यावी लागणार आहे.

...

लसीचा तुटवडा आहे. लस उपलब्ध होताच लोक गर्दी करतात. ते टाळण्यासाठी ही लिंक तयार केली आहे. यातून घरबसल्या ऑनलाईन अपॉइंटमेंट घेता येईल. सर्व माहिती योग्य भरल्यास आपल्याला नोंदणीकृत मोबाईल व व्हॉट्सॲपवर संदेश पाठविला जाईल. सर्वांनी सहकार्य करून गर्दी टाळावी. ही सुविधा केवळ ४५ वर्षांवरील लोकांसाठी आहे.

-डॉ.आर.बी. पवार, जिल्हा आरोग्य अधिकारी, बीड.

===Photopath===

150521\15bed_9_15052021_14.jpg~150521\15bed_8_15052021_14.jpg