‘साथ मरेंगे’ या इराद्याने प्रेमीयुगुलाने घेतला गळफास; ‘तो’ दगावला, दोर तुटल्याने ‘ती’ बचावली

तरुणाचे सोशल मीडियाद्वारे विवाहितेशी जुळले होते प्रेमसंबंध

जातेगाव (जि. बीड) : सोशल मीडियावर धागे जुळले. ती विवाहित, पण प्रेम म्हणजे प्रेम असतं. दोघेही प्रेमात आकंठ बुडाले. दोन दिवसांपूर्वी ती त्याच्याकडे आली. तिच्या पतीने पोलिसांत तक्रार करण्याचा इरादा बोलून दाखविला. अन् सोबत जगण्यामरण्याच्या आणाभाका घेतलेल्या ‘त्या’ दोघांनीही गळफास लावून जगाचा निरोप घेण्याचे ठरविले. यात गळफास लागून ‘तो’ दगावला, मात्र दोर तुटल्याने ‘ती’ बचावली.

ही घटना आहे, बीड जिल्ह्यातील भेंड बुद्रुकची. जयपाल लक्ष्मण वाव्हळ (वय २७, रा. भेंड बुद्रुक, ता. गेवराई) असे आत्महत्या केलेल्या युवकाचे नाव आहे. जयपाल वाव्हळ याचे कल्याण येथील तीसवर्षीय विवाहित महिलेसोबत सोशल मीडियाद्वारे प्रेम जुळले. दोन दिवसांपूर्वी ही विवाहित महिला भेंड बुद्रुक येथे आली.

रविवारी या महिलेला तिच्या पतीने फोन करून गुन्हा दाखल करीन असे बजावले असता, ‘साथ मरेंगे’ या इराद्याने सोमवारी पहाटे घरातील आढ्याला या प्रेमीयुगुलाने गळफास घेतला. पण दोर तुटला. त्यामुळे ती वाचली. मात्र, जयपाल वाव्हळ याचा यामध्ये मृत्यू झाला. याबाबत तलवाडा पोलीस ठाण्यात गुन्हा नोंदविण्यात आला असून एम. डी. कुवारे पुढील तपास करीत आहेत.