बस रिव्हर्स घेताना धक्का लागल्याने एकाचा मृत्यू

एसटी व चौकाच्या दगडी भिंत यांच्यामध्ये दबले गेले

अंबाजोगाई (बीड) : तालुक्यातील धानोरा खुर्द येथे प्रवासी बस रिव्हस घेतांना चौकाच्या भिंतीच्या शेजारी उभा असलेल्या एका व्यक्तीचा दबून मृत्यू झाल्याची घटना शनिवारी  घडली. दगडू केशव शितोळे ( वय ५५) रा. तटबोरगाव असे मयत व्यक्तीचे नाव आहे.

अंबाजोगाईहून  सकाळी आठ वाजता आपेगावला देवळा मार्गे एसटी बस रोज येते. शनिवारी सकाळी नऊ वाजता धानोरा खुर्द चौकात बस क्रमांक ( एम. एच. २० बी. ए. १२९६) आली असता गाडीचा चालकास आपेगावचा रस्ता माहित  नसल्याने त्यांने धानोरा गावाकडे गाडी वळवली. रस्ता चूकल्याने गाडी आपेगावकडे घेण्यासाठी ती रिव्हर्स घेतांना चौकाच्या शेजारी तटबोरगाव येथील दगडू केशव शितोळे हे उभा होते. यावेळी गाडीच्या डावी बाजू शितोळे यांच्या अंगावर दबली गेली. एसटी व चौकाच्या दगडी भिंत यांच्यामध्ये  दबल्याने ते गंभीर जखमी झाले.  चौकातील प्रत्यक्षदर्शी नागरिकांनी त्यांना स्वाराती रूग्णालयात उपचारासाठी दाखल केले असता डॉक्टरांनी तपासताक्षणीच मयत घोषीत केले. दगडू शितोळे यांच्या पश्चात पत्नी, एक मुलगी व दोन मुले असा परिवार आहे.