गुरूंच्या विरहाने शिष्याने तोडला दम !

लोकमत न्यूज नेटवर्क

माजलगाव(जि.बीड): येथील सद्गुरू श्री मिस्कीन स्वामी मठ संस्थानचे पूर्व मठाधिपती सद्गुरू श्री तपोरत्नं प्रभुपंडिताराध्य शिवाचार्य महास्वामीजी माजलगावकर महाराज यांचे सेवेकरी विलास विठ्ठलअप्पा शेटे (वय ४५) यांना गुरूंचा विरह सहन न झाल्याने हृदयविकाराने त्यांचे शनिवारी दुपारी १.४० वाजता निधन झाले. माजलगावकर महाराजांचा समाधी सोहळा उरकल्यानंतर काही वेळातच समाधीस्थळी विलासअप्पा शेटे यांनी जगाचा निरोप घेतला.

शुक्रवारी दुपारी १ वाजता माजलगाव मठाचे मठाधिपती सद्गुरू माजलगावकर महाराज शिवचरणी लीन झाले. त्यांचा समाधी सोहळा शनिवारी सकाळी ११ वाजता माजलगाव मठामध्ये करण्यात आला. हा समाधी सोहळा पार पडल्यानंतर विलासअप्पा शेटे यांना हृदयविकाराचा त्रास होऊ लागला. तातडीने त्यांना येथील देशपांडे हॉस्पिटलमध्ये दाखल करण्यात आले असता येथील डॉक्टरांनी त्यांना मृत घोषित केले. त्यांनी समाधीस्थळीच दम सोडला असल्याचे भाविक सांगत होते.

गेल्या अनेक वर्षांपासून विलासअप्पा शेटे कुठल्याही अपेक्षेविना नि:स्वार्थ भावनेने माजलगाव मठाची सेवा करीत होते. त्यांची काम करण्याची हातोटी आणि विलक्षण चपळता माजलगावकर महाराजांना भावल्याने, अगदीच कमी काळात ते त्यांचे विश्वासू सेवेकरी झाले. आज त्यांच्या अशा अचानक जाण्याने समग्र वीरशैव समाज पुन्हा एकदा शोकसागरात बुडाला असून, केवळ दोनच दिवसात हा दुसरा मोठा धक्का या समाजाला सहन करावा लागला आहे.

...

110921\purusttam karva_img-20210911-wa0020_14.jpg

सेेवेकरी विलास शेटे यांचे निधन