शेततळ्यांमुळे पडीक शेती झाली हिरवीगार

लोकमत न्यूज नेटवर्क

कडा : कायम दुष्काळी भाग असलेला आष्टी तालुक्यात कृषी विभागाच्या मार्गदर्शनाखाली शेतकऱ्यांनी शेततळ्यांची निर्मिती केली आहे. यामुळे तालुक्यातील पाच हजार हेक्टरवरील पडीक शेती फुलली आहे. या शेतीत शेतकरी भाजीपाला, फळबाग व हंगामी पिके घेत आहेत.

जिथे पिण्याच्या पाण्यासाठी पायपीट करावी लागायची तिथे शेतीला पाणी आणायचे कुठून? असा प्रश्न शेतकऱ्यांसमोर होता. पावसाचे प्रमाण कमी होत गेल्याने शेतकरी आर्थिक अडचणीत सापडला होता. फळबाग शेती व हंगामी पिके घेताना पाण्याची चिंता भेडसायची. पण कृषी विभागाच्या योग्य सल्ल्याने तालुक्यात २२९१ शेतकऱ्यांनी शेततळी खोदले. या माध्यमातून शाश्वत शेती करण्यासाठी शेतकरी पुढे सरसावला आहे.

आष्टी तालुक्यातील शेतकरी हंगामी पिकाला महत्त्व देत. कृषी विभागाने वेळोवेळी शेततळ्यांबाबत जनजागृती केली. विविध योजनेच्या माध्यमातून शेततळी खोदून त्याचा लाभ घेण्याचे आवाहन केले. मागील पाच वर्षांत तालुक्यात २२९१ शेततळे शेतकऱ्यांनी खोदले. पावसाळ्यातच ही शेततळे भरून ठेवले जात आहेत. उन्हाळ्यात या पाण्याचा इतर पिके व फळबागांसाठी वापर केला जातो. यातून पाच हजार एकर क्षेत्रावर फळबागांची जोपासना झाली आहे. एरवी पाण्याअभावी फळबागा जळून जायच्या; पण आता पाण्याअभावी फळबागांना कसलीच भीती राहिली नाही.

......

भविष्यात शेतकऱ्यांनी मोठ्या प्रमाणावर शेततळे खोदून पाण्याचा साठा ठेवावा. या पाण्याचा वापर शेतीसाठी करावा. यातून आर्थिक उन्नती साधावी. पावसाळ्यात शेततळी भरून घ्यायला हवीत. कृषी विभागाचे वेळोवेळी सहकार्य आहेच. काही अडचण भासल्यास शेतकऱ्यांनी कृषी विभागाचा सल्ला घ्यावा.

- राजेंद्र सुपेकर, तालुका कृषी अधिकारी, आष्टी.

.....

दुष्काळी परिस्थितीवर मात करण्यासाठी कृषी विभागाच्या मार्गदर्शनाखाली शेततळे उभारले आहे. आज शेतीला कसलीच पाणी टंचाई भासत नाही. भरपूर पाणी उपलब्ध झाले आहे. त्यामुळे माझी शेती चांगली बहरली आहे.

- रामदास बांगर, शेतकरी, मातावळी, ता. आष्टी.

.....

शेततळ्यांची संख्या

सामूहिक शेततळे - ४७५

अस्तरीकरणासहित शेततळे - ३८

फक्त अस्तरीकरण शेततळे - ४१

फक्त खोदकाम केलेले शेततळे - ४७६

मागेल त्याला शेततळे योजनेअंतर्गत शेततळे - १२६१