कोरोना चाचणीसाठी मच्छिंद्रनाथ देवस्थानचा पुढाकार

तालुक्यातील मच्छिंद्रनाथ देवस्थानने कोविड सेंटरनंतर आता कोरोनाच्या महागड्या तपासण्यांसाठीही पुढाकार घेतला आहे. यासाठी चाळीस हजार चाचणी कीटचे नियोजन केले आहे़, अशी माहिती आमदार तथा विश्वस्त सुरेश धस यांनी दिली.

रविवारी दुपारी मच्छिंद्रनाथ देवस्थानवर रॅपिड अँटिजन तपासणी सेवेचा प्रारंभ तहसीलदार राजाभाऊ कदम, नायब तहसीलदार प्रदीप पांडुळे यांच्या हस्ते करण्यात आला. देवस्थानने सेवाभावाच्या तत्त्वावर मनुष्यबळाचा खर्च सहन करीत महागड्या तपासण्यांसाठीचा पुढाकार घेतला आहे. रॅपिडचे दहा हजार कीट उपलब्ध झाले आहेत. प्रास्ताविक देवस्थानचे अध्यक्ष दादासाहेब चितळे यांनी केले. यावेळी सचिव बाबासाहेब मस्के, सरपंच राजेंद्र मस्के, विजयानंद स्वामी, डॉ. अजित लोणकर, अशोक पवार, दीपक वामन, नवनाथ मस्के आदी उपस्थित होते. येथील कोविड सेंटरमध्ये चाळीस रुग्ण उपचार घेत आहेत. येथे देवस्थानच्या वतीने दोन वेळ सकस आहार, चहा, नाष्टा, गुळवेल काढा, तर रात्री हळद युक्त दूध रुग्णांना दिले जाते, असे अध्यक्ष दादासाहेब चितळे यांनी सांगितले.