ऊस गाळपात जयमहेश कारखाना मराठवाड्यात अव्वल

रांजणी कारखाना दुसऱ्या स्थानी : साखर उताऱ्यात पूर्णा कारखाना आघाडीवर

पुरूषोत्तम करवा

माजलगाव (जि. बीड) : मागील तीन महिन्यांपासून मराठवाड्यातील १४ साखर कारखान्यांचे गाळप सुरू आहेत. आतापर्यंत ५ लाख मे.टन उसाचे गाळप करत माजलगाव तालुक्यातील जयमहेश शुगर अव्वल स्थानी राहिला, तर रांजणी येथील नॅचरल शुगर कारखाना साडेचार लाख मे. टन उसाचे गाळप करत दुसऱ्या स्थानी आहे. साखर उताऱ्यात मात्र वसमत येथील पूर्णा कारखाना नंबर एकवर आहे.

गतवर्षी व यावेळी चांगला पाऊस पडल्याने उसाची मोठ्या प्रमाणावर शेतकऱ्यांनी लागवड केली. माजलगाव तालुक्यातील एक खासगी व दोन सहकारी साखर कारखान्यांनी मागील तीन महिन्यांपासून जोरदार गाळप सुरू केले. पवारवाडी येथील जयमहेश शुगर या खासगी कारखान्यात रोज ४ हजार ५०० मे.टन ऐवढे गाळप होत आहे. २२ जानेवारीपर्यंत ४ लाख ६८ हजार ५३० मे.टन गाळप करत मराठवाड्यातील १४ कारखान्यांत सर्वांत जास्त उसाचे गाळप करणारा हा कारखाना ठरला. रांजणी येथील नॅचरल कारखान्याना ४ लाख ५७ हजार ४३० मे.टन उसाचे गाळप करत दुसऱ्या स्थानी राहिला. तेलगाव येथील लोकनेते सुंदरराव सोळंके सहकारी साखर कारखाना ३ लाख ९३ हजार ६०० मे.टन उसाचे गाळप करत तिसऱ्या स्थानी राहिला.

साखर उताऱ्यात पूर्णा आघाडीवर

मराठवाड्यातील १४ कारखान्यांपैकी वसमत येथील पूर्णा कारखान्याचा साखर उतारा हा सर्वांत जास्त १०.५५ एवढा आहे. त्याखालोखाल नांदेड येथील बळीराजा कारखान्याचा साखर उतारा १०.३२ व बागेश्वरी येथील श्रद्धा कारखान्याचा साखर उतारा १०.१२ आहे.

मराठवाड्यातील कारखान्यांचे गाळप

समर्थ कारखाना (महाकाळा) ३ लाख ७८ हजार ६३० मे.टन , बळीराजा (नांदेड) ३ लाख ३५ हजार ७०० मे.टन , येडेश्वरी (सारणी) ३ लाख २१ हजार ३७० मे.टन, ट्वेन्टी वन शुगर (सायखेडा) २ लाख ७७ हजार ३५५ मे.टन ,श्रद्धा (बागेश्वरी) २ लाख ५२ हजार १० मे.टन , जयभवानी(गढी ) २ लाख ३५ हजार ५८१ मे.टन , सागर (तीर्थपुरी) २ लाख ३० हजार ७०० मे.टन , पूर्णा (वसमत) २ लाख २७ हजार ४१० मे.टन , भाऊराव (नांदेड) २ लाख १४ हजार ९८० मे.टन, छत्रपती (सावरगाव) १ लाख ७९ हजार ९१० मे.टन, योगेश्वरी (लिंबा) १ लाख ३६ हजार ७२७ मे. टन.

११ लाख यन गाळपाचे उद्दिष्ट

माजलगाव तालुक्यातील शेतकरी ,कारखान्याचे कर्मचारी , ऊसतोड कामगारांच्या सहकार्यामुळे गाळप चांगल्यापद्धतीने सुरू असल्याने हे शक्य झाले आहे. यावर्षी आमचे ११ लाख मे.टन गाळपाचे उद्दिष्ट आहे.

-- गिरीश लोखंडे , उपाध्यक्ष, जयमहेश शुगर, पवारवाडी, ता. माजलगाव