माजलगाव ग्रामीण रुग्णालयात डॉक्टरांचा अभाव - A

खासगी दवाखान्याकडे धाव

पुरुषोत्तम करवा

माजलगाव : येथील ग्रामीण रुग्णालयात ऐन कोरोना आपत्ती काळात प्रसूतीतज्ज्ञ व भूलतज्ज्ञ डॉक्टर उपलब्ध नसल्यामुळे या रुग्णालयात ५० टक्के महिलांनी पाठ फिरवत खासगी दवाखान्याची वाट धरली, तर सिझर करण्याची वेळ आल्याने १७० महिलांना इतरत्र रेफर करण्याची वेळ आली. असे असतानाही वरिष्ठांना याचे काही देणे-घेणे राहिले नाही.

माजलगाव ग्रामीण रुग्णालयात मागील दोन वर्षांच्या काळात चांगल्या प्रकारे रुग्णांना सुविधा मिळत होत्या. यामुळे दररोज ४००-५०० ओपीडी होत असत. या ग्रामीण रुग्णालयात दर महिन्याला १५० ते २०० प्रसूती होत असत. यामुळे हे रुग्णालय २-३ वर्षांपूर्वी नावारूपाला आले होते, परंतु मागील एक वर्षांपासून डॉक्टरांच्या अभावामुळे रुग्णांची हेळसांड होत आहे. प्रसूतीतज्ज्ञ व भूलतज्ज्ञ नसल्यामुळे या ठिकाणी ऐन कोरोनाकाळात प्रसूतीच्या संख्येत मोठी घट झाली.

१ एप्रिलपासून ३१ डिसेंबर, २०२० या आठ महिन्यांत ९८च्या सरासरीने केवळ ७८६ प्रसूतींची नोंद झाली. त्यापैकी ७५८ महिलांच्या प्रसूती झाल्या असून, केवळ २८ सिझर करण्यात आले. हे झालेले सिझर एप्रिल ते ऑगस्टदरम्यान झाले होते. ऑगस्टनंतर एकही सिझर या ठिकाणी करण्यात आले नाही.

सिझर करण्याची वेळ आल्याने जवळपास मागील आठ महिन्यांत

सिझर करण्याची वेळ आलेल्या १७० महिलांना या रुग्णालयातून इतरत्र रेफर करण्यात आले. डॉक्टरांच्या अभावामुळे या ठिकाणी सध्या केवळ शंभर ते दीडशेच ओपीडी होत असल्याची माहिती येथील कर्मचाऱ्यांनी दिली.

कोरोनाच्या काळात या ठिकाणी सुविधा मिळत नसल्याने, मोठ्या प्रमाणावर महिलांना प्रसूतीसाठी ग्रामीण रुग्णालयाकडे पाठ फिरवत, खासगी रुग्णालयाचा आधार घ्यावा लागला. यामुळे सर्वसामान्य नागरिकांना मोठा आर्थिक फटका बसत असताना, वरिष्ठांना याचे काहीच सोयरसुतक राहिलेले नाही.

या रुग्णालयाला मागील काही महिन्यांपासून प्रसूतीतज्ज्ञ नसल्यामुळे या ठिकाणी सिझर करण्यात आले नाही. प्रसूतीतज्ज्ञांची आम्ही अनेक वेळा वरिष्ठांकडे मागणी केली आहे. लवकरच डॉक्टर मिळतील, त्यानंतर सर्व सुरळीत होईल.

-डॉ.सुरेश साबळे, वैद्यकीय अधीक्षक, ग्रामीण रुग्णालय