अरणवाडीच्या तलावासाठी राष्ट्रवादीचे रस्ता रोको 

अरणवाडी येथील साठवण तलावाचे काम पंधरा वर्षा पासून रखडले आहे.

धारूर (बीड ) : अरणवाडी येथील साठवण तलावाचे काम पंधरा वर्षा पासून रखडले आहे. याचा परिणाम येथील शेती क्षेत्रावर होत आहे यामुळे या तलावाचे काम त्वरित सुरु करण्याच्या मागणीसाठी आज दुपारी धारूर-तेलगाव रोडवर राष्ट्रवादी कॉंग्रेसने रस्ता रोको आंदोलन केले.

तालुक्यातील अरणवाडी येथील साठवण तलावाचे काम मागील पंधरा वर्षांपासून रखडलेले आहे. या तलावाच्या क्षेत्रातील चोरंबा, अरणवाडी, थेटेगव्हाण या भागातील शेती शेती यामुळे सिंचनापासून वंचित राहते. या भागातील शेतीला सिंचनाखाली आणण्यासाठी तलावाचे काम तात्काळ पूर्ण करावे या मागणीसाठी राष्ट्रवादी काँग्रेसच्या वतीने तेलगाव रोडवर तलावाच्या भागात रस्ता रोको आंदोलन करण्यात आले. या सोबतच संपूर्ण तालुक्यातील बोंडअळीग्रस्त शेतीचे पंचनामे करावे अशी मागणी आंदोलनाचे नेतृत्व करताना माजीमंत्री प्रकाश सोळंके यांनी केली. आंदोलनात राष्ट्रवादी युवक काँग्रेसचे जिल्हाध्यक्ष जयसिंग सोंळके, ईश्वर मुंडे, नितीन शिनगारे यांच्यासह मोठ्यासंख्यने कार्यकर्ते, शेतकरी उपस्थित होते.