वाळुच्या उत्खननाकडे दुर्लक्ष, मंडळ अधिकारी, तलाठी निलंबित

जिल्हाधिकारी अविनाश पाठक यांनी रुजू होताच कामकाजात दुर्लक्ष करणाऱ्यांना दणका दिला आहे.

बीड: गेवराई तालुक्यातील राक्षसभुवन येथील वाळु घाटातून वाळु उत्खननाकडे दुर्लक्ष केल्या प्रकरणी गेवराई तालुक्यातील धोंडराईचे मंडळ अधिकारी पुरुषोत्तम सुधाकर आंधळे व तलाठी किरण प्रभाकर दांडगे यांना ४ जुलै रोजी निलंबित करण्यात आले आहे. जिल्हाधिकारी अविनाश पाठक यांनी रुजू होताच कामकाजात दुर्लक्ष करणाऱ्यांना दणका दिला आहे.

गेवराई तालुक्यातील राक्षसभुवन येथील वाळुघाटाची पाहणी ३ जुलै रोजी केली असता त्या ठिकाणी मोठ्या प्रमाणात अवैधरित्या वाळुचे उत्खनन झाल्याचे आढळून आले. वाळुच्या अवैध उत्खननावर लक्ष ठेवणे ही तलाठी व मंडळ अधिकारी यांची प्राथमिक जबाबदारी आहे. ही जबाबदारी पार पाडण्यात अक्षम्य दिरंगाई केली आहे. त्यामुळे शासनाने मोठ्या प्रमाणात आर्थिक नुकसान झाले आहे. त्यामुळे राक्षसभुवन सज्जाचे तलाठी किरण प्रभाकर दांडगे व धोंडराईचे मंडळ अधिकारी पुरुषोत्तम सुधाकर आंधळे यांना निलंबीत करण्यात आले आहे.