नियमित कर्जफेड करणाऱ्या शेतकऱ्यांची उपेक्षा

अंबेजोगाई : राज्य सरकारने दोन वेळा वेगवेगळ्या योजनेंतर्गत दोन लाखांपर्यंतची शेतकऱ्यांची कर्जे माफ केली, तर कर्जाची प्रामाणिकपणे परतफेड करणाऱ्या शेतकऱ्यांना सरकारकडून ५० हजार रुपये प्रोत्साहनपर अनुदान दिले जाणार होते. मात्र, दोन वर्षे पूर्ण होत आली, तरी या शेतकऱ्यांच्या खात्यांवर एक रुपयाही आला नाही. याबाबत शासनाने शेतकऱ्यांना ठेंगाच दाखविला आहे.

कोरोनाच्या संकटसमयी शासनाने प्रामाणिक शेतकऱ्यांना मदत करावी, अशी अंबेजोगाई तालुक्यातील शेतकऱ्यांची मागणी आहे. शेतकऱ्यांसमोर गारपीट, अतिवृष्टी, नापिकी अशी विविध संकटे समोर आलेली असतानाही या शेतकऱ्यांनी उसनवारी करत, घरातील दागिने विक्री करून डोक्यावर कर्ज नको, म्हणून बँकेचे कर्ज फेडले. अशा शेतकऱ्यांना प्रोत्साहनपर अनुदान मिळणे आवश्यक होते. मात्र, अशा प्रामाणिक शेतकऱ्यांची दखल शासन घ्यायला तयार नाही. आजही या शेतकऱ्यांसमोर मोठा अडचणीचा डोंगर आहे. रासायनिक खतांच्या वाढलेल्या किमती, डिझेल दरवाढीमुळे ट्रॅक्टर चालकांनी मशागतीच्या कामाचे वाढविलेले दर यामुळे हे शेतकरी अडचणीत आले आहेत. नियमितपणे कर्जाची परतफेड करूनही त्यांच्या पदरी निराशाच आली आहे.