धनादेश न वठल्याने प्राध्यापकाला शिक्षेसह दंड

बीड : बांधकाम साहित्य खरेदी केल्यानंतर दिलेला धनादेश न वठल्याने दाखल प्रकरणात प्रा. बाळासाहेब दगडू लाखे यांना दोषी ठरवून एक महिना कारावासाची शिक्षा व धनादेशाची रक्कम तसेच २० हजार रुपये नुकसान भरपाई फिर्यादीला देण्याचा आदेश प्रथमवर्ग न्यायदंडाधिकारी ए. बी. सोनटक्के यांच्या न्यायालयाने दिला. लाखे यांनी बांधकाम साहित्याचे व्यापारी प्रशांत राजमल बोरा यांच्याकडून १ लाख ५ हजार ५१२ रुपयांचे साहित्य खरेदी केले होते. त्यावेळी ४५ हजार ५१२ रुपये नगदी व उर्वरित रकमेचा धनादेश दिला होता. मात्र, धनादेश न वठल्याने बोरा यांनी ॲड. सागर नाईकवाडे यांच्यामार्फत न्यायालयात फौजदारी प्रकरण दाखल केले. न्यायालयाने दोन्ही पक्षांचा पुरावा नोंदवून व कागदोपत्री पुराव्याचे अवलोकन करून आरोपीला दोषी ठरवून उपरोक्त निर्णय दिला.