घरात घुसून मोबाइल चोरणाऱ्याला पोलिसांनी केले जेरबंद

घरात घुसून मोबाइल चोरणाऱ्या तरुणाला पोलिसांनी केले जेरबंद.

-- शहर पोलिसांची कामगिरी

माजलगाव : घरात रात्रीच्या वेळी कोणी असल्या नसल्याचा फायदा घेत, गुपचूप घरात घुसून मोबाइल चोरणारा तरुण माजलगाव शहर पोलिसांनी जेरबंद केला. एका आठवड्यात दुसरा मोबाइल चोर पकडण्यात शहर पोलिसांना यश आले आहे. अटक केलेल्या चोरट्यास न्यायालयाने दोन दिवसांची पोलीस कोठडी सुनावली आहे.

माजलगाव शहरात गेल्या अनेक दिवसांपासून मोबाइलच्या चोरीच्या घटना घडत होत्या. आठवडी बाजार रहदारीची ठिकाणे घडणाऱ्या सदरील घटनांवर नियंत्रण ठेवण्यासाठी पोलिसांनी आपली माणसे नेमली. मागील पंधरा दिवसांपासून रात्रीच्या वेळी कोणीही घरात नसल्याचा व खिडकीतून शिताफीने मोबाइलची चोरी होण्याच्या तक्रारी पोलिसांकडे येत होत्या. या तक्रारींची दखल घेत, पोलिसांनी एका संशयितास गुरुवारी ताब्यात घेतले. यावेळी पोलिसांच्या चौकशीत संशयिताने शिवाजीनगर, आयशानगर भागातून विविध नामांकित ब्रॅन्डचे ६ मोबाइल (एकूण किंमत ७५ रुपये) चोरल्याची कबुली दिली.

रात्रीच्या वेळी घरात कोणी नसल्याचा फायदा घेत व मोबाइल चार्जिंगला असताना, खिडकीतून चोरल्याची कबुली दिली. दरम्यान, आरोपी तारेक मुसा पठाणच्या विरोधात पोलिसात गुन्हा दाखल करण्यात आला आहे. त्याला न्यायालयाने २ दिवसांची पोलीस कोठडी सुनावली आहे. पुढील तपास पोलीस निरीक्षक धनंजय फराटे व सपोनि अविनाश राठोड यांच्या मार्गदर्शनाखाली पोलीस नाईक बी.एन. डापकर हे करत आहेत.