पीक विम्यासाठी बीडमध्ये लाल वादळ

बीड : खरीप हंगाम २०२० मध्ये झालेल्या नुकसानीपोटी पीक विम्याची रक्कम मिळावी म्हणून बीड जिल्हा अखिल भारतीय किसान सभेच्या नेतृत्वाखाली शुक्रवारी येथील जिल्हाधिकारी कार्यालयासमोर निदर्शने करण्यात आली.

२०२० च्या खरीप हंगामात अतिवृष्टीमुळे झालेल्या सर्व पीक नुकसानीचे शासनाच्या महसूल विभागाने पीक पंचनामे केलेले आहेत. शेतकऱ्यांना मदतही मिळाली. मात्र जिल्ह्यातील हजारो शेतकऱ्यांनी पीक विमा भरलेला असताना महसूल विभागाने केलेले नुकसानीचे पंचनामे गृहीत धरून सर्व नुकसानग्रस्त शेतकऱ्यांना सरसकट पीकविमा देण्यात यावा. तसेच प्रधानमंत्री पीक विमा योजनेतील शेतकऱ्यांना जाचक ठरणाऱ्या अव्यवहार्य अटी शर्तींचा फेरविचार करून त्या वगळून ही योजना शेतकऱ्यांना झालेल्या पीक नुकसानाची भरपाई मिळण्यास सुलभ करावी. आदी मागण्यांसाठी अखिल भारतीय किसान सभेच्या वतीने ही निदर्शने करण्यात आली. यावेळी किसान सभेचे नेते कॉ. ॲड. अजय बुरांडे, कॉ. दत्ता डाके,कॉ. मुरलीधर नागरगोजे, कॉ. मोहन लांब आदीसह जिल्ह्यातील किसान सभेचे पदाधिकारी व शेतकरी मोठ्या संख्येने उपस्थित होते.

-------

पालकमंत्र्यांचे आश्वासन

आंदोलना दरम्यान जिल्ह्याचे पालकमंत्री धनंजय मुंडे यांनी किसान सभेच्या शिष्टमंडळाशी चर्चा केली. राज्य शासनाच्या वतीने

याबाबतीत लक्ष देऊन शेतकऱ्यांवर पीक विम्या संदर्भात अन्याय होणार नाही याची काळजी घेतली जाईल असे आश्वासन त्यांनी दिले.

---------

आंदोलनाने लक्ष वेधले

जिल्ह्याभरातून आलेले शेतकरी छत्रपती शिवाजी महाराज चौकात जमा झाल्यानंतर रॅली काढून जिल्हाधिकारी कार्यालयावर दाखल झाले. छत्रपती शिवाजी महाराज चौक ते जिल्हाधिकारी कार्यालय मार्गावर शेतकऱ्यांच्या घोषणा व हातातील लाल झेंडे बीडकरांचे लक्ष वेधत होते.

300721\img_20210730_132243_14.jpg~300721\img_20210730_131327_14.jpg