सहायक नगररचनाकार पदाचा अतिरिक्त कार्यभार काढला

तक्रारी वाढल्याने जिल्हाधिकाऱ्यांचे आदेश

बीड : पाटोदा नगरपंचायतीतील सहायक नगररचनाकार सय्यद सलीम सय्यद याकुब यांच्याकडे बीड पालिकेतील सहायक नगररचनाकार पदाचा अतिरिक्त कार्यभार सोपविला होता. मात्र, सय्यद सलीम यांच्याविरुद्ध तक्रारी वाढल्याने त्यांच्याकडील पदभार काढून घेण्यात आला.

बीड पालिकेत सहायक नगररचनाकारपद रिक्त होते. त्यामुळे पाटोदा नगरपंचायतीचे सय्यद सलीम यांच्याकडे अतिरिक्त कार्यभार सोपवावा, अशी विनंती मुख्याधिकाऱ्यांनी केली होती. त्यानुसार, १६ ऑगस्ट २०२० रोजी सलीम यांच्याकडे अतिरिक्त पदभार सोपविला गेला.

आठवड्यातील तीन दिवस बीड पालिकेचे कामकाज पाहावे, असे आदेश होते. मात्र, सलीम यांनी अतिरिक्त कार्यभार पाहताना मोठ्या प्रमाणात अनियमितता केल्याचा आरोप करण्यात आला होता. पठाण आमेर खान, मुकर्रम जान पठाण, इनामदार निजाम यांच्यासह वंचित बहुजन आघाडीचे जिल्हा सदस्य अजय सरवदे यांनीही जिल्हाधिकाऱ्यांकडे सय्यद सलीम यांची तक्रार केली होती. या तक्रारीच्या अनुषंगाने जिल्हाधिकाऱ्यांनी सय्यद सलीम यांच्याकडील बीड पालिकेतील सहायक नगररचनाकार पदाचा अतिरिक्त कार्यभार रद्द करण्याचे आदेश जारी केले. पालिका मुख्याधिकाऱ्यांना

या आदेशाचा अनुपालन अहवाल सादर करण्याचे निर्देशही त्यांनी दिले.