माजलगाव नगरपालिकेवर भगवा फडकवा - A

माजलगाव : येथील नगरपालिकेची निवडणूक काही महिन्यांवर येऊन ठेपली आहे. ती ताब्यात घेण्यासाठी शिवसैनिकांनी एकत्र येऊन शहरातील वार्डावार्डांत जाऊन जनतेला शिवसेनेचे महत्त्व-कार्य सांगून, घर तिथे शिवसैनिक तयार करून पालिकेवर भगवा फडकवावा, असे शिवसेना नेते तथा गृहराज्यमंत्री शंभुराजे देसाई यांनी शिवसेना पदाधिकाऱ्यांशी बोलताना सांगितले.

गृहराज्यमंत्री शंभुराजे देसाई रविवारी परभणी येथील कार्यक्रमास जात असताना त्यांनी माजलगाव येथे शनिवारी रात्री शिवसेना जिल्हाप्रमुख अप्पासाहेब जाधव यांच्या निवासस्थानी धावती भेट दिली. यावेळी देसाई यांचा जाधव कुटुंबीय, पदाधिकारी, शिवसैनिकांनी सत्कार केला. देसाई यांनी जिल्ह्यातील शिवसेना मजबूत करण्यासाठी जिल्हाप्रमुख अप्पासाहेब जाधव, पदाधिकाऱ्यांसह शिवसैनिकांशी संघटन वाढीबरोबरच अनेक विषयांवर चर्चा केली.

कोरोना संकटाच्या काळात जिल्ह्यातील शिवसेनेने केलेल्या कार्याचे कौतुकही देसाई यांनी केले. जाधव कुटुंबीयांची व पदाधिकारी यांची विचारपूस केली.

याप्रसंगी कडाजीराव जाधव, उपजिल्हाप्रमुख रामराजे सोळंके, तुकाराम येवले, नगरसेवक अशोक आळणे, दासू बादाडे, अमोल डाके, अतुल उगले, कल्याण मोहिते, दिनेश मोहिते, सुखदेव धुमाळ, महादेव वैराळे, शुभम डाके, विठ्ठल जाधव, मुंजाबा जाधव, कदम आदींसह मोठ्या संख्येने शिवसैनिकांची उपस्थिती होती.