संदीपान भूमरेंची कन्या राष्ट्रवादीकडून सरपंचपदी; ठाकरे गटाच्या उमेदवाराचा केला पराभव

शिवसेना ठाकरे गटाच्या उमेदवाराचा पराभव करत सरपंच पदी विराजमान

- सखाराम शिंदे 
गेवराई : पंडितांचा बालेकिल्ला तालुक्यातील दैठण ग्रामपंचायत सरपंच पदाच्या निवडणुकीसाठी शिवसेना व राष्ट्रवादी गटात तगडी फाईट झाली. यात राष्ट्रवादी काँग्रेसकडून संभाजीराव पंडित यांच्या सुन प्रेरणा प्रताप पंडित या निवडुन आल्या आहेत. विशेष म्हणजे, प्रेरणा पंडित या राज्याचे रोजगार हमी योजना मंत्री संदिपान भुमरे यांच्या कन्या असून त्यांनी त्यांनी शिवसेना ठाकरे गटाच्या उमेदवाराचा पराभव केला आहे. संपूर्ण तालुक्याचे लक्ष या लढतीकडे होते.

दैठण ग्रामपंचायतीच्या सरपंच पदाच्या महिला राखीव असलेल्या जागासाठी राष्ट्रवादी काँग्रेस कडून माजी सरपंच प्रतापसिंह पंडित यांच्या पत्नी प्रेरणा पंडित यांना उमेदवारी देण्यात आली होती. विशेष म्हणजे त्या रोजगार हमी योजना मंत्री संदिपान भुमरे यांच्या कन्या आहेत. त्यांच्या विरोधात शिवसेना ठाकरे गटाच्या शुभांगी निळकंठ पंडित उभा होत्या. एकंदरी स्थिती पाहता दैठण ग्रामपंचायत निवडणुकीत शिवसेना विरुद्ध राष्ट्रवादी काँग्रेस अशी तगडी फाईट पाहायला मिळाली. यात राष्ट्रवादी काँग्रेसच्या उमेदवार प्रेरणा पंडित यांचा दणदणीत विजय झाला आहे. निवडणुकीत अमरसिंह पंडित गटाच्या प्रेरणा पंडित यांच्यासह सर्व नऊ सदस्यही विजयी झाले.