भरधाव कारच्या धडकेत ऊसतोड कामगाराच्या मुलाचा मृत्यू 

शहराजवळील झमझम पेट्रोलपंपासमोरील बायपासवरून रस्ता ओलांडत असताना झाला अपघात

गेवराई ( बीड ) : बीडहून जालन्याकडे जाणाऱ्या भरधाव कारच्या धडकेत ऊसतोड कामगाच्या मुलाचा मृत्यू झाल्याची घटना गुरुवारी मध्यरात्री झाली. सचिन बसवंत जाधव ( वय २२, रा. कुडगी जि. विजापूर  ) असे मृताचे नाव आहे.  

गुरुवारी मध्यरात्री सचिन शहराजवळील झमझम पेट्रोलपंपासमोर बायपासवरून रस्ता ओलांडत होता. याचवेळी बीडहून जालन्याकडे जाणाऱ्या एका जीपने (क्रमांक एम एच २१ बी क्यू ०७३७ ) सचिनला जोराची धडक दिली. डोक्याला मार लागल्याने गंभीर जखमी सचिनचा जागीच मृत्यू झाला. 

सचिनचे वडील गढी येथील साखर कारखान्यावर उसतोड मजूर असल्याची माहिती आहे. माहिती मिळताच गेवराई पोलिस ठाण्याचे पो.ना नवनाथ गोरे , आय आर बी चे डॉ महादेव भातकर यांनी घटनास्थळी येऊन घटनेचा पंचनामा केला. याप्रकरणी उशिरापर्यंत गेवराई पोलिस ठाण्यात गुन्हा दाखल करण्यात आला नव्हता.