मारफळा तांड्यावर विवाहितेचा संशयास्पदरीत्या मृत्यू

महिलेला तालखेड येथील ग्रामीण रुग्णालयात गंभीर जखमी अवस्थेत उपचारासाठी दाखल करण्यात आले.

माजलगाव : तालुक्यातील मारफळा तांडावरील विवाहितेचा संशयास्पदरित्या मृत्यू झाल्याची घटना शुक्रवारी घडली. मीना संतोष राठोड ( ३५ ) असे मृत महिलेचे नाव आहे. पती भोळसर असल्यामुळे सासरकडील मंडळीकडून विवाहितेला वारंवार त्रास दिला जात असे, यातूनच त्यांचा खून झाल्याचा आरोप माहेरच्या नातेवाईकांनी केला आहे.

माहेरच्या नातेवाईकांच्या आरोपानुसार, माजलगाव - गढी रोडवर असलेल्या मारफळा तांडा येथे मीना संतोष राठोड राहत. मीनाचा नवरा भोळसर असल्याने तिचा दीर, जाऊ, सासरे, मामी सासरे आदी मंडळी वारंवार त्रास देत असत. सासरकडील मंडळीने शुक्रवारी सायंकाळी ४-५ वाजेच्या सुमारास मीनाला बेदम मारहाण केली. यानंतर रात्री तिला तालखेड येथील ग्रामीण रुग्णालयात गंभीर जखमी अवस्थेत उपचारासाठी दाखल केले. येथे डॉक्टरांनी तपासून तिला मृत घोषित केले. दरम्यान, विलास प्रभाकर राठोड हे कंडाक्टरची नोकरी करत. त्यांच्याकडे काही वर्षापूर्वी रेशन दुकान होते. ते रेशन दुकान आठ वर्षांपूर्वी भाऊ संतोषकडे दिले. मात्र, मागील दोन-तीन वर्षांपासून तोही दुकान परत मागत होता. या कारणावरूनही भावाभावात भांडण होत असे. यातून मीनाचा खून झाला असल्याचा आरोप मीनाचे वडील पंडीत जाधव यांनी केला आहे. हा खून की आत्महत्या हे शवविच्छेदनाच्या अहवालानंतरच स्पष्ट होणार आहे. 

हेही वाचा - कुख्यात गुंडाकडून विवाहितेवर अत्याचार; बळजबरीने गोळ्या खायला लावून केला गर्भपात