आईवडिलांना मारहाण करून रोख ५ लाखांसह अडीच लाखांचे दागिने नेले

बीड : मुलाने वडील व आईला मारहाण करून तसेच घरात पेट्रोल टाकून जाळून टाकण्याची धमकी देत घरातील रोख ५ लाख व २ लाख ४० हजाराचे सोन्याचे दागिने लंपास केले. याप्रकरणी आईच्या फिर्यादीवरून परळी पोलीस ठाण्यात स्वत:च्या मुलाविरुद्ध ११ फेब्रुवारी रोजी गुन्हा दाखल झाला आहे.

रुक्मिणी शिवाजीराव गित्ते (रा.स्वातीनगर परळी ) यांच्या फिर्यादीनुसार ६ फेब्रुवारी रोजी त्यांचा मुलगा धनराज व त्याच्यासोबत ४ अनोळखी इसम घरी आले. यावेळी त्यांच्या हातात हातोडी, लोखंडी गज व बाटलीत पेट्रोल होते. धनराज याने त्याचे वडील शिवाजीराव यांना हातोड्याने मारहाण करण्याचा प्रयत्न केला. तर आईला फरफटत नेत त्यांच्याजवळील चावी हिसकावून घेत तिजोरीतील रोख ५ लाख रुपये व २ लाख ४० हजारांचे सोन्याचे दागिने लंपास केले. त्यानंतर घरात बाटलीतील पेट्रोल टाकून भाऊ बलभीम व त्याची पत्नी व मुलांना जाळण्याचा प्रयत्न केला. याप्रकरणी रुक्मिणी गित्ते यांच्या फिर्यादीवरून मुलगा धनराज गित्ते व इतर चार अनोळखी इसमांविरुद्ध गुन्हा दाखल आहे. तपास पोउपनि जाधव हे करत आहेत.