डॉक्टर तरुणीला दोन लाखांचा गंडा

अंबाजोगाई : लग्न जुळवणाऱ्या मॅट्रीमोनिअल वेबसाइटवर झालेली ओळख तालुक्यातील एका डॉक्टर तरुणीस चांगलीच महागात पडली. कस्टममध्ये अडकलेली बॅग सोडवण्याचा बहाणा करून त्या तरुणीला सायबर भामट्याने १ लाख ९५ हजार रुपयांचा गंडा घातला. याप्रकरणी दोघांवर शहर ठाण्यात २५ सप्टेंबर रोजी फसवणुकीचा गुन्हा दाखल करण्यात आला.

तालुक्यातील एक डॉक्टर तरुणी मुंबईच्या जेजे हॉस्पिटलमध्ये नोकरीस आहे. तिच्या फिर्यादीनुसार, यावर्षी जून महिन्यात तिची एका मॅट्रीमोनिअल वेबसाइटवर राहुल चांदेकर याच्यासोबत ओळख झाली. त्यानंतर दोघात मैत्री झाली व व्हाॅटस्ॲपवर मेसेज सुरू झाले. १ जुलै रोजी राहुलने तिला कॉल केला आणि तो लंडनला असून, काही दिवसांत मुंबईला स्थायिक होणार असल्याचे सांगितले; परंतु माझी एक लगेज बॅग दिल्ली विमानतळावर कस्टमचे पैसे न भरल्याने अडकली आहे, ती बॅग तू पैसे भरून सोडवून घे आणि तुझ्याकडे ठेव, मी आल्यावर घेतो, अशी बतावणी राहुलने केली. थोड्याच वेळात एका मोबाइलवरून त्या तरुणीला कॉल आला आणि समोरून बोलणाऱ्या व्यक्तीने दिल्लीच्या कस्टम ऑफिसमधून बोलत असल्याचे सांगून तिला पैसे भरण्यासाठी बँकेचा खाते क्रमांक दिला. या सर्व भूलथापांना बळी पडून त्या तरुणीने विविध व्यवहारांतून एकूण १ लाख ९५ हजार रुपये त्या खात्यावर जमा केले. संशय आल्याने त्या तरुणीने कस्टम डिपार्टमेंटमध्ये चौकशी केली असता अशा कोणत्याही व्यक्तीच्या नावे तिथे बॅग नसल्याचे तिला समजले. त्यानंतरही राहुलने तिला पैसे पाठविण्यासाठी आग्रह धरला; परंतु फसवणूक झाल्याचे लक्षात आले असल्याने तिने थेट अंबाजोगाई शहर ठाणे गाठून तक्रार नोंदवली. राहुल चांदेकरसह अन्य एका अनोळखी व्यक्तीवर फसवणुकीचा गुन्हा दाखल झाला आहे.