दुचाकी घसरल्याने ऊसतोड मुकादम ठार

माजलगाव : साखर कारखान्यास पट्टा पडल्याने घर जवळ करण्यासाठी निघालेला ऊसतोड मुकादम दुचाकी घसरल्याने झालेल्या अपघातात जागीच ठार झाला. ही घटना राष्ट्रीय महामार्गावर खरात आडगाव फाट्याजवळ शुक्रवारी दुपारी साडेबारा वाजता घडली.

परमेश्वर शिवाजी घाटे (२७, रा. कापडसिंगी ता. सेनगाव, जि. हिंगोली) हा ऊसतोडणी मुकादम वडवणी तालुक्यातील ख. लिमगाव या शिवारात आपल्या टोळीसह ऊसतोडणीचे काम करत होता. साखर कारखान्याचा पट्टा पडल्याने ही टोळी राष्ट्रीय महामार्ग कल्याण-विशाखापट्टणमवरून ट्रकमधून आपल्या गावी कापडसिंगीकडे निघाली होती. तर, परमेश्वर घाटे दुचाकीवरून ट्रकच्या मागेपुढे प्रवास करत गावाकडे निघाला होता. दरम्यान, माजलगाव तालुक्यातील खरात आडगाव फाट्याजवळ परमेश्वर घाटे यांची दुचाकी अचानक घसरली व फरफटत जाऊन रस्त्याच्या बाजूला किलोमीटर दर्शवणाऱ्या दगडावर घाटे यांचे डोके जोरात आदळले. त्यामुळे मोठा रक्तस्राव होऊन घाटे यांचा जागीच मृत्यू झाला. दरम्यान, शवविच्छेदनासाठी ग्रामीण रुग्णालयात आणण्यात आले. या मृत्यूप्रकरणी ग्रामीण पोलिसात अकस्मात मृत्यूचा गुन्हा दाखल करण्यात आला.