Video: भरधाव जीपने दुचाकीस्वारास उडवले; थरकाप उडवणाऱ्या घटनेचा व्हिडिओ व्हायरल

अपघातानंतर चालक जीप तिथेच सोडून फरार झाला आहे

- नितीन कांबळे
कडा- आठवडी बाजार करून गावाकडे परतत असताना भरधाव जीपने दुचाकीस्वाराला उडवल्याची घटना रविवारी दुपारी घडली. यात दुचाकीस्वार गंभीर जखमी झाला असून त्याच्यावर अहमदनगर येथील खाजगी रूग्णालयात उपचार सुरू आहेत. दरम्यान, या अपघाताचा थरकाप उडवणार व्हिडिओ व्हायरल झाला आहे.  

भरधाव जीपने दुचाकीस उडवले; अंगाचा थरकाप उडवणाऱ्या आष्टी ताकुक्यातील घटनेचा व्हिडिओ व्हायरल pic.twitter.com/g3C4os0PTb

— Lokmat Chhatrapati Sambhajinagar (@milokmatabd) September 4, 2023

आष्टी तालुक्यातील मांडवा येथील ज्ञानदेव परसराम जाधव हे रविवारी  आष्टी येथील आठवडी बाजारकरून दुपारी साडेबाराच्या दरम्यान दुचाकीवरून गावाकडे जात होते. दरम्यान, बावीकडून आष्टीकडे येत असलेल्या भरधाव जीपने शिंदेवाडी चौकात जाधव यांच्या दुचाकीस जोरदार धडक दिली. जीपचा वेग जास्त असल्याने दुचाकी आणि जाधव दूर फेकल्या गेले. जाधव रस्त्याच्या बाजूच्या खड्ड्यात पडल्याने गंभीर जखमी झाले. त्यांना लागलीच नागरिकांनी उपचारासाठी रुग्णालयात दाखल केले. सध्या जाधव यांच्यावर अहमदनगर येथील रूग्णालयात उपचार सुरू आहेत. तर अपघातानंतर जीप चालक घटनास्थळावरून पसार झाला आहे.