पतीच्या खूनप्रकरणी पत्नीला अटक

बीड : गेल्या आठवड्यात गेवराई तालुक्यातील संगम जळगाव येथे राजकुमार बडे यांचा मृतदेह त्यांच्याच शेतात आढळून आला होता. याप्रकरणी नातेवाईकांनी तक्रार न दिल्यामुळे पोलिसांनी गुन्हा दाखल केला होता. शवविच्छेदन अहवाल व तपासादरम्यान राजकुमार यांचा गळा आवळून खून केल्याचे उघड झाले. खूनप्रकरणी पत्नीला अटक केली आहे.

राजकुमार अश्रुबा बडे (वय ५१ वर्ष रा.संगम जळगाव ता.गेवराई) असे मयताचे नाव असून, त्यांचा मृतदेह त्यांच्याच शेतात आढळला होता. नातेवाईकांनी या प्रकरणी फिर्याद देण्यास नकार दिला होता. मात्र, पोलिसांना संशय आल्याने त्यांनी मयताचा शवविच्छेदन अहवाल मागवला, यात गळा आवळल्याने मृत्यू झाल्याचे अहावलात नमुद होते, तरी देखील नातेवाईकांनी फिर्याद दिली नाही. त्यामुळे बीट आमलदार विठ्ठल देशमुख यांच्या फिर्यादीवरून गेवराई पोलीस ठाण्यात खुनाचा गून्हा दाखल करण्यात आला होता . तपासा दरम्यान सगळी माहिती व पुरावे यांच्या आधारावर पत्नीनेच पतीचा खून केल्याचे उघड झाले, याप्रकरणी मिराबाई राजकुमार बडे यांना अटक करण्यात आली आहे. त्यांना न्यायालयात हजर केले असता, १ दिवसाची पोलीस कोठडी सुनावली आहे. अशी माहिती गेवराई ठाण्यातील तपास अधीकारी प्रफुल्ल साबळे यांनी दिली आहे.