पुतणीसोबत खेळणाऱ्या ९ वर्षीय मुलीवर अत्याचार करणारा तरुण अटकेत
By लोकमत न्यूज नेटवर्क | Published: July 15, 2021 02:25 PM2021-07-15T14:25:05+5:302021-07-15T14:25:22+5:30
rape on niece's 9-year-old friend : सकाळी साडेदहादरम्यान समवयीन नऊ वर्षीय दोन मुली एका घरात खेळत होत्या.
माजलगाव (जि. बीड) : घरात खेळत असलेल्या नऊ वर्षाच्या अल्पवयीन मुलीवर तीस वर्षीय युवकाने अत्याचार केला. ही घटना मंगळवारी सकाळी साडेदहा वाजेदरम्यान घडली. आरोपी विरोधात ग्रामीण पोलिसात पोस्कोसह इतर गुन्हे दाखल करण्यात आले असून, आरोपीला पोलिसांनी अटक केली आहे.
तालुक्यातील एका गावातील घरामध्ये मंगळवारी सकाळी साडेदहादरम्यान समवयीन नऊ वर्षीय दोन मुली खेळत होत्या. यावेळी त्याच घरातील तीस वर्षीय युवक बाजूला उभा राहून हा खेळ पाहत होता. दरम्यान, त्या दोन मुलींतील एक मुलगी या युवकाची पुतणी (भावाची मुलगी) होती. यावेळी आरोपीची पुतणी असणारी मुलगी खेळ सोडून काही कामानिमित्त बाहेर निघून गेली. यादरम्यान आरोपीने घरात एकटीच असलेल्या त्या नऊ वर्षाच्या मुलीवर अत्याचार केला.
काही वेळाने मुलीच्या आईने पीडित मुलीला रुग्णालयात नेले. यावेळी डॉक्टरांनी तिच्यावर अत्याचार झाल्याचे सांगितले. याविषयी मुलीला विचारणा केली असता तिने ही घटना केलेल्या नराधमाचे नाव सांगितले. दरम्यान, पीडित मुलीच्या आईच्या फिर्यादीवरून आरोपीविरोधात ग्रामीण पोलीस ठाण्यात पोस्कोसह इतर गुन्हे दाखल करण्यात आले आहेत. आरोपीला पोलिसांनी अटक केली आहे. प्रकरणाचा पुढील तपास सपोनि नीता गायकवाड या करत आहेत.