प्रेमप्रकरणातून लग्न करण्यास नकार दिल्याने तरुणीने केली आत्महत्या

विशाल शिंदे

नेकनूर (जि.बीड) : बीड तालुक्यातील मांजरसुंबा घाटामध्ये एका नर्सने गळफास घेऊन आत्महत्या केली. ही घटना २६ जुलै रोजी दुपारच्या सुमारास उघडकीस आली होती. ही आत्महत्या प्रेमप्रकरणातून झाल्याचे समोर आले असून, एकाविरुद्ध नेकनूर पोलीस ठाण्यात गुन्हा दाखल करण्यात आला आहे.

सोनाली अंकुश जाधव ( रा.पालवण रोड, शिवाजीनगर, बीड) असे गळफास घेऊन आत्महत्या केलेल्या महिलेचे नाव आहे. सोनालीचे बारावीपर्यंत शिक्षण झालेले आहे. बारावीपर्यंत शिक्षण झाल्यानंतर तिचा विवाह तिच्या मामाच्या मुलासोबत २०१२ मध्ये झाला होता; मात्र काही कारणास्तव ती पतीपासून विभक्त राहत होती. ती बीड शहरातील एका खासगी रुग्णालयात नर्स होती. दरम्यान, लॅब टेक्निशियन असलेल्या अक्षय राजाभाऊ आव्हाड (रा.स्वराज्यनगर, बीड) याच्यासोबत तिचे प्रेमसंबंध होते. अक्षय हा विवाहित असून, त्याला दोन मुले देखील आहेत; मात्र सोनाली त्याला विवाह करण्याची मागणी करत होती. आपला विवाह झाल्याचे अक्षयने लपवून ठेवले होते. अक्षय याने विवाह करण्यास नकार दिला. याच कारणावरून सोनाली जाधव हिने मांजरसुंबा घाटातील रस्त्याच्या बाजूला असलेल्या एका लिंबाच्या झाडाला ओढणीच्या सहाय्याने गळफास घेऊन आत्महत्या केली.

घटनेची माहिती मिळताच नेकनूर पोलिसांनी घटनास्थळी जाऊन जिल्हा रुग्णालयात शवविच्छेदन करण्यासाठी मृतदेह पाठवला होता. याप्रकरणी सोनाली आत्महत्याप्रकरणी नेकनूर पोलीस ठाण्यात अक्षय आव्हाड याच्याविरुद्ध गुन्हा दाखल करण्यात आला असून ठाणे प्रमुख सपोनि लक्ष्मण केंद्रे यांच्या मार्गदर्शनाखाली उपनिरीक्षक किशोर काळे तपास करत आहेत.

लग्नासाठी झाली होती बोलणी

सूत्रांनी दिलेल्या माहितीनुसार लॅब टेक्निशियन अक्षय आव्हाड आणि सोनाली जाधव यांच्या प्रेमसंबंधाविषयी दोन्हीकडील मंडळीला माहिती होती. काही दिवसांपूर्वी अक्षयचे वडील राजाभाऊ आव्हाड हे सोनालीच्या घरी गेले होते. ती देखील त्याच्या घरी गेली होती, बोलणी सुरु असतानाच सोनालीचा भाऊ अजय जाधव याला त्याच्या मामाने माहिती दिली की, अक्षयचा विवाह झाला असून, त्याला दोन मुलं देखील आहेत. त्याची माहिती घेऊन पुढील निर्णय घ्यावा. दरम्यान, अक्षय याने ही बोलणी झाल्यानंतर सोनालीला विवाहास नकार दिला. त्यामुळे ती नैराश्यात होती. यातूनच तिने आत्महत्या केल्याचे फिर्यादीत नमूद केले आहे.