२०२५चा शुभारंभ बुधवारी: गणपती बाप्पाला ‘ही’ एकच गोष्ट अर्पण करा, वर्षभर पुण्य लाभ मिळवा!

New Year 2025 Budhwar Ganpati Puja In Marathi: सन २०२५ची सुरुवात बुधवारी होत असून, श्री गणेशाचे शाश्वत शुभाशिर्वाद लाभण्यासाठी नेमके काय करावे? जाणून घ्या...

New Year 2025 Budhwar Ganpati Puja In Marathi: वक्रतुण्ड महाकाय सूर्यकोटि समप्रभ। निर्विघ्नं कुरु मे देव सर्वकार्येषु सर्वदा॥ सन २०२५चा शुभारंभ होत आहे. सन २०२४ मध्ये केलेल्या चुका टाळून, सुधारून नवीन संकल्पाची अंमलबजावणी करण्याची सुरुवात होणार आहे. इच्छा, अपेक्षा, आकांक्षा, स्वप्न, संकल्प घेऊन नवीन वर्ष २०२५ सुरू होत आहे. अनेकार्थाने २०२५ हे वर्ष विशेष आणि वैशिष्ट्यपूर्ण मानले जात आहे. सन २०२५ या नववर्षाची सुरुवात बुधवारी होत आहे. कोणत्याही शुभकार्याची सुरुवात, नवीन कामाचा प्रारंभ प्रथमेश विघ्नहर्ता गणपती बाप्पाच्या पूजनाने, स्मरणाने केला जातो. जाणून घेऊया...

गणपती बाप्पा हे आबालवृद्धांचे आराध्य दैवत! तो समरांगणात अग्रस्थानी लढणारा, आनंदाच्या प्रसंगी मनसोक्त नाचणारा, गोड-धोड आवडीने खाणारा, शिक्षणाची आवड आणि आस्था बाळगणारा असा सर्वांना आदर्श वाटणारा असा देव आहे. गणपती बुद्धीची देवता आहे. गणपती ही वैश्विक देवता आहे. गणेश ही प्रेरणा देणारी देवता आहे. विविध कलांच्या अविष्काराने सर्वांशी खुला संवाद साधणारे आणि सर्वांना आपलेसे वाटणारे हे दैवत. पराक्रमी असले तरी कोपिष्ट नाही, तेजस्वी असले तरी तापहीन असे हे दैवत. यामुळेच देवत्व असलेला गणपती जवळचा आणि आपल्यातलाच वाटतो.

बुधवारी केलेल्या गणपती पूजनाचे अनन्य साधारण महत्त्व

गणपती बाप्पाच्या केवळ नामस्मरणाने सकारात्मकता येते. एका चैतन्यमय उर्जेचा संचार होतो. महादेव आणि पार्वती देवींचा पुत्र गणेश प्रथमेश मानला गेला आहे. कोणत्याही कार्याची सुरुवात करताना प्रथम गणपती स्मरण केले जाते, हे सर्वश्रुत आहे. साधारणपणे मंगळवारी गणपतीचे विशेष पूजन, नामस्मरण करण्याला प्राधान्य दिले जाते. मात्र, बुधवारी केलेल्या विशेष गणपती पूजन, भजन, नामस्मरण यालाही अनन्य साधारण महत्त्व आहे.

मनोभावे गणपती पूजन, आवडता पदार्थ करा अर्पण

बुधवारी सकाळी लवकर उठून स्नानादि कार्ये उरकल्यानंतर श्री गणेशाचे पूजन करावे. आपण दररोज करतो, तशीच पूजा करावी. षोडषोपचार किंवा पंचोपचार पूजा केल्यास चांगले. गणपती पूजा झाल्यावर गणपती बाप्पाला आवडणारे जास्वदाचे एखादे फूल वाहावे. लाडू किंवा मोदक यांचा नैवेद्य दाखवावा. लाडू किंवा मोदक नसतील, तर गोडाचा नैवेद्य दाखवावा. गणपती बाप्पाला आवडणाऱ्या वस्तू, गोष्टी अर्पण केल्यास ते भाविकांसाठी शुभलाभदायक ठरू शकते. तसेच गणपतीचा ‘ॐ गं  गणपतये नम:’ हा मंत्र १०८ वेळा किंवा जितका शक्य असेल, तितक्या वेळा म्हणावा.

दुर्वा अर्पण करणे शुभ फलदायी, मिळेल सुख-समृद्धी अन् बुद्धी

बुधवारी गणपतीला दुर्वा अर्पण करणे शुभ फलदायी मानले गेले आहे. या दिवशी २१ दुर्वांची जोडी अर्पण केल्याने गणपती प्रसन्न होतात आणि भक्तांना सुख-समृद्धी आणि बुद्धीप्रदान करतात, असे सांगितले जाते. धार्मिक पुराणांमध्ये गणपतीला बुद्धीचा देवता मानले गेले आहे. दुर्वा अर्पण केल्याशिवाय गणपती बाप्पाची पूजा पूर्ण होत नाही आणि पूजेचे पुण्यही लाभत नाही, अशी मान्यता असल्याचे सांगितले जाते. 

बुधवारी कराल बाप्पाचे पूजन, बुध ग्रह देईल शुभाशिर्वचन

ज्योतिषशास्त्रात बुध ग्रहाला वाणी, वाणिज्य, लेखन, कायदा आणि गणित यांचे कारक मानले गेले आहे. एखाद्या व्यक्तीच्या कुंडलीत बुध ग्रह कमकुवत असेल, तर बुधवारी गणपती बाप्पाची पूजा, नामस्मरण करणे लाभदायक ठरते, अशी मान्यता असल्याचे सांगितले जाते. तसेच बुध ग्रहाशी संबंधित वस्तूंचे दान करावे. बुध ग्रहाच्या मंत्रांचा यथाशक्ती जप करावा. गणपतीला प्रिय असलेल्या वस्तू अर्पण केल्याने बाप्पा प्रसन्न होतो, असे मानले जाते.