दुसरा श्रावणी सोमवार: ‘असे’ करा शिवपूजन, व्रताचरण; कोणती शिवामूठ वाहावी? पाहा, महत्त्व

Second Shravan Somvar 2024: दुसऱ्या श्रावणी सोमवारी करावयाचे व्रताचरण, शिवपूजन आणि शिवामूठ कोणती वाहावी, याबाबत जाणून घ्या...

Second Shravan Somvar 2024: चातुर्मास सुरू आहे. श्रावण महिन्याची सुरुवात श्रावणी सोमवारी झाली होती. पहिल्या श्रावणी सोमवारी अगदी उत्साहात आणि आनंदात व्रताचरण करण्यात आले. अनेकांनी शिव मंदिरात जाऊन महादेवाचे दर्शन घेतले. विविध पद्धतीचे अभिषेक यथासांग, यथाशक्ती करण्यात आले. शिवपूजनासाठी श्रावण महिना सर्वोत्तम मानला जातो. आता दुसरा श्रावणी सोमवार येत आहे. या दिवशी कोणती शिवामूठ वाहावी? व्रताचरण कसे करावे? जाणून घेऊया...

भगवान महादेवांनी कामासूरावर विजय मिळवला होता, तसे आपल्या मनातील, विचारातील वासना नियंत्रणात राहण्यासाठी श्रावणातील व्रते आयोजली असल्याची मान्यता आहे. जी व्यक्ती देहावर आणि मनावर नियंत्रण मिळवू शकते, ती कोणतीही गोष्ट मिळवू शकते, असा विश्वास श्रावणी सोमवारच्या उपासनेतून आणि व्रतामधून प्राप्त होतो, असे सांगितले जाते. दुसरा श्रावणी सोमवार १२ ऑगस्ट २०२४ रोजी आहे. 

कोणती शिवामूठ वाहावी?

सोमवार हा शंकराचा वार मानला गेल्यामुळे श्रावणी सोमवारला विशेष महत्त्व प्राप्त होते. देशभरातील कोट्यवधी शिवभक्त या दिवशी महादेव शिवशंकरांची विशेष पूजा करतात. जलाभिषेक आणि रुद्राभिषेक मोठ्या भक्तिभावाने केला जातो. दुसऱ्या श्रावणी सोमवारी तीळ शिवामूठ म्हणून वाहण्याची परंपरा आपल्याकडे आहे.

दुसऱ्या श्रावणी सोमवारी शिवपूजन कसे करावे?

श्रावण सोमवारी संपूर्ण दिवस उपवास करावा. तो दुसऱ्या दिवशी सोडावा. मात्र, आजारी व्यक्ती, गर्भवती महिला, ज्येष्ठ नागरिकांनी रात्री भोजन केले तरी चालते. श्रावण सोमवारी सकाळी लवकर उठून नित्यकर्म उरकल्यानंतर श्रावणी सोमवार व्रताचा संकल्प करावा. यानंतर महादेव शिवशंकरांचे ध्यान करावे. 'ॐ नमः शिवाय' या मंत्रोच्चारासह शिवशंकरांची तर, 'ॐ नमः शिवायै' या मंत्रोच्चारासह पार्वती देवीची यथोचित षोडशोपचारी पूजा करावी. या दिवशी एकभुक्त राहावे. शक्य असल्यास घराजवळच्या एखाद्या उद्यानात थोडा वेळ जाऊन यावे. अशा तऱ्हेने हे व्रत एकूण चौदा वर्षे करून मग त्याचे यथासांग उद्यापन करावे, असे सांगितले जाते.