Tarot Card: श्रावणातला शेवटचा आठवडा तुमच्यासाठी कसा असणार? हे तुम्ही निवडलेल्या कार्डवरून ठरणार!

Tarot Card: टॅरो कार्ड रिडींगनुसार दिलेल्या कार्डपैकी मनाचा कौल मिळेल ते कार्ड निवडा आणि आगामी साप्ताहिक भविष्य जाणून घ्या!

>> सुमेध रानडे, टॅरो कार्ड रीडर, पुणे

साप्ताहिक टॅरो मार्गदर्शन
10 ते 16 सप्टेंबर
===============

नंबर 1:

हा सप्ताह तुमच्यासाठी महत्त्वाचा आहे. वेगाने घडामोडी घडतील. जमीन, घर किंवा इतर कुठल्याही जागेच्या बाबतीत चांगली प्रगती होऊ शकते. एका वडीलधाऱ्या व्यक्तीचा दबदबा राहील. नियम आणि अनुशासन यांचं महत्त्व तुम्हाला जाणवेल. एक प्रकारचं स्थैर्य येईल. तुमचा आत्मविश्वास वाढेल.

या आठवड्यात तुम्ही एकदम करारीपणे वाटचाल करायची आहे. तुमचं परखड आणि प्रामाणिक मत मांडा. कसलीही भीती किंवा न्यूनगंड बाळगू नका. ध्येय निश्चित करून त्या दिशेने सगळे प्रयत्न करा. नियमांना सोडून मुळीच वागू नका. एक शिस्तबद्धपणा ठेवा. मोठ्यांचा आदर करा. भावनिक होऊन अडकू नका.

नंबर 2:

हा सप्ताह तुमच्यासाठी नवीन उमेद घेऊन येत आहे. मागचं विसरून नवीन सुरुवात करण्यासाठी तयार रहा. एक प्रसन्न आणि उत्साहवर्धक घटना घडू शकते. चांगला सकारात्मक बदल घडू शकतो. तुमचा आत्मविश्वास वाढेल. नवीन संकल्पना सुचतील. तुमच्या ध्येयाच्या दिशेने एक पाऊल पुढे जाल.

या आठवड्यात तुम्ही नवीन काहीतरी सुरू करायचं आहे. तुमच्या मनात सुरू असलेले विचार आणि कल्पना लोकांपर्यंत पोचवा. मोकळेपणाने व्यक्त व्हा. सृजनशीलता बाळगा, वेगळ्या पद्धतीने काम करा. बदल घडत असतील तर ते स्वीकारा. गर्व न करता स्वतःचं केलेलं काम इतरांना दाखवा.

नंबर 3:

हा सप्ताह तुमच्यासाठी मिश्र स्वरूपाचा असणार आहे. तुमच्या ध्येयापर्यंत पोचाल पण तरीसुद्धा समाधान मिळणार नाही. आणखी पुढे काहीतरी करायला हवं अशी भावना येईल. भौतिक सुखसोयींपासून एक प्रकारची विरक्ती येऊ शकते. कंटाळा येऊ शकतो. कामामध्ये विलंब होऊ शकतो.

या आठवड्यात तुम्ही तुमच्या मनाशी एकनिष्ठ राहायचं आहे. खरंच तुम्हाला नक्की काय हवं आहे, याचा नीट विचार करा आणि त्याप्रमाणे पुढे चाला. उथळ गोष्टींमध्ये अडकून राहू नका. भावनांमध्ये, भूतकाळात किंवा नैराश्यात अडकून राहू नका. मागे घडलेलं काहीतरी एकदाचं सोडून द्या. कुठेही खूप गुंतू नका.

श्रीस्वामी समर्थ.