Tarot Card: येत्या आठवड्यात काही गोष्टी मनासारख्या घडतील तर काही मनाविरुद्ध; वाचा साप्ताहिक भविष्य!

Tarot Card: टॅरो कार्डनुसार तीनपैकी एक कार्ड निवडून तुम्हाला तुमचे साप्ताहिक भविष्य जाणून घेता येते; मनाचा कौल घ्या आणि कार्ड निवडा!

>> सुमेध रानडे, टॅरो कार्ड रीडर, पुणे

साप्ताहिक टॅरो मार्गदर्शन
१७ ते २३ मार्च
===============

नंबर १:

हा सप्ताह तुमच्यासाठी पेलायला अवघड असणार आहे. तुम्हाला बऱ्याच गोष्टींचा ताण किंवा दडपण येऊ शकते. कामामध्ये तुम्ही शेवटच्या टप्प्याजवळ पोचणार आहात पण इथे तुमची परीक्षा होणार आहे. मनाने भक्कम राहून पुढची वाटचाल केली तर काही प्रमाणात यश मिळेल. डोके, डोळे, पाठ, कंबर यांची दुखणी होऊ शकतात. 

या आठवड्यात तुम्ही खूप गोष्टी एका वेळी अंगावर घेऊ नका. इतरांच्या बोलण्याने किंवा वागण्याने स्वतःला त्रास करुन घेऊ नका. अतिविचार करणे सोडा. परिस्थिती प्रतिकूल असताना मनाने खंबीर रहा. एकटे पडू नका. चार चौघात बोलून मोकळे व्हा. तब्येतीची काळजी घ्या. गरज वाटत असेल तर विश्रांती घ्या.

नंबर २:

हा सप्ताह तुमच्यासाठी मागे केलेल्या कामाचे चांगले फळ घेऊन येत आहे. तुमच्या कष्टाचं चीज होईल. लोकांकडून तुमचं कौतुक होण्याची शक्यता आहे. तुम्हाला हवं असलेलं नाव, हुद्दा, मान सन्मान, बक्षिस किंवा कौतुकाचे शब्द हे या सप्ताहात मिळू शकतात. एखादं अडकलेलं काम मार्गी लागेल, काही प्रश्न सुटतील.

या आठवड्यात तुम्हाला तुमचे पाय जमिनीवर ठेवण्याची गरज आहे. हुरळून जाऊ नका. लोकांना एकत्र घेऊन पुढे चाला. तुमच्या संघातील सगळ्यांना तुमचा आधार द्या. इतरांसाठी तुम्ही त्यांची ढाल बना. एक आदर्श नेतृत्व करा. पण अरेरावी करू नका. काही लोक तुमचा दुस्वास करू शकतात, पण त्यांच्याकडे दुर्लक्ष करा आणि पुढे चाला.

नंबर ३:

हा सप्ताह तुमच्यासाठी आनंदाचा आणि समाधानाचा असणार आहे. एखादा प्रमुख टप्पा गाठला जाईल. त्यामुळे तुम्हाला आतून उत्साह वाटेल. एखादा कार्यक्रम ठरेल. एखादा सण साजरा केल्यासारखा आनंद होईल. सगळ्यांची साथ मिळेल. एक चांगले निष्पन्न निघेल. केलेल्या कष्टाचं चीज होईल. पुढची वाट मोकळी होईल.

या आठवड्यात तुम्ही आत्तापर्यंत केलेल्या परिश्रमाचे चांगले परिणाम अनुभवणार आहात. त्यासाठी तुम्ही थोडी सवड काढण्याची गरज आहे. तुम्हाला ज्यांनी आत्तापर्यंत साथ दिली त्यांच्याबद्दल कृतज्ञ राहून त्यांना तुमच्या आनंदात सामील करुन घ्या. आत्ता पाया मजबूत करुन पुढचे नियोजन करण्याची तयारी सुरु करा.

श्रीस्वामी समर्थ.