दोन दिवसांत ५० लाखांवर कराचा भरणा

चलनातील ५०० व १००० रुपयांचा नोटा बंद करण्याचा निर्णय प्रधानमंत्र्यांनी मंगळवारी रात्री जाहीर केला.

धसका ५००, १०० रुपयांच्या नोटा बंदचा : नगरपरिषद, नगरपंचायत, ग्रामपंचायतींना आले ‘अच्छे दिन’
भंडारा : चलनातील ५०० व १००० रुपयांचा नोटा बंद करण्याचा निर्णय प्रधानमंत्र्यांनी मंगळवारी रात्री जाहीर केला. त्यानंतर नोटा बदलवून घेण्यासाठी लोकांची बँकांमध्ये गर्दी होऊ लागली. दरम्यान, स्थानिक स्वराज्य संस्थांच्या विविध कराची रक्कम जुन्या नोटांनी भरण्याची मुभा दिल्यामुळे नगर परिषद, नगर पंचायत व ग्रामपंचायतींना ‘अच्छे दिन’ आले आहेत. मागील दोन दिवसात जिल्ह्यातील सातही नगर परिषद, नगर पंचायततीत नागरिकांनी ५० लाखांवर कराचा भरणा केला.
प्रधानमंत्री नरेंद्र मोदी यांनी ५०० व १००० रूपयांच्या चलनी नोटा बंद करण्याचा निर्णय घेतला. याबदल्यात त्यांनी दोन हजार रूपयांची नवीन नोट चलनात आणली आहे. अनेकांच्या घरात ५०० व १००० रुपयांच्या या नोटा आहेत. चलनातून या नोटा बंद झाल्याने नागरिकांसमोर पेच निर्माण झाला. त्यामुळे कमाई बुडेल ही धास्ती नागरिकांमध्ये निर्माण झाली. दरम्यान, नागरिकांना दिलासा देण्यासाठी केंद्र सरकारने चलनातून बंद होत असलेल्या या नोटांचा वापर स्थानिक स्वराज्य संस्थांचा कर भरण्यासाठी वापर करता येईल अशा सूचना नगर विकास विभागाला देण्यात आले.
प्रधानमंत्र्यांचा आवाहनाला प्रतिसाद देत नागरिकांनी गुरूवार, शुक्रवार व शनिवारला कराचा भरणा केला. दोन दिवसात ५० लाखांवर कराचा भरणा जिल्ह्यासाठी विक्रम ठरला आहे. भंडारा, तुमसर, पवनी, साकोली नगर परिषद तर मोहाडी, लाखांदूर व लाखनी नगर पंचायतीत नागरिकांनी मालमत्ता कर, गृह कर, पाणीपट्टी कर, दिवाबत्ती कर यासह अन्य करांचा भरणा केला. यापोटी शुक्रवारला नागरिकांकडून ३३ लाख ७० हजार २०३ रुपये भरण्यात आले.
शनिवारला या रक्कमेत मोठी वाढ झाली. रात्री उशिरापर्यंत हा आकडा उपलब्ध झाला नसला तरी जिल्ह्यात करापोटी जमा होणारा आकडा हा ५० ते ७० लाखांचा घरात जाणार असल्याचा अंदाज वर्तविण्यात येत आहे. पवनी तालुक्यातील कोंढा येथील नागरिकांनी गृहकर व पाणीपट्टी कराचे पैसे ग्रामपंचायतीत जमा केले असून दोन दिवसात ३० हजार रूपये जमा झाले आहे. (शहर प्रतिनिधी)

डाक विभागात ५० लाखांची उलाढाल
भंडारा प्रधान डाक घरात मागील दोन दिवसात ५० लाखांची उलाढाल झाली आहे. शुक्रवार व शनिवारला नागरिकांनी बंद झालेल्या ५०० व १००० च्या चलनी नोटा बदलवून घेतल्या. यात २६ लाखांचा आर्थिक व्यवहार झाला. अनेकांनी त्यांच्याजवळील रक्कमेतून डाक विभागात गुंतवणूक केलेली आहे. यात नेहमीपेक्षा दुपटी आणि तिपटीने वाढ झाली आहे. दोन दिवसात भंडारा प्रधान डाक विभागाचा आर्थिक व्यवहार ५० ते ६० लाखांवर पोहचला आहे. आणखी या रकमेत वाढ होण्याची शक्यता आहे. नागरिकांना सुविधा पुरविण्यासाठी डाक विभागाने तीन कक्ष सुरू केले आहे. उद्या रविवारला डाक विभागाची सर्व सेवा सुरू राहणार असल्याची माहिती पोस्ट मास्टर अविनाश अवचट व विपनन अधिकारी बी. डी. सोनकुसरे यांनी ‘लोकमत’शी बोलताना दिली.

कर भरण्यासाठी नागरिकांची धाव
पालिका प्रशासन करा भरा, असे आवाहन करीत असते. परंतु कर भरण्यासाठी टाळाटाळ होत असते. मात्र चलनी नोटा बंद होत असल्याचा धसका घेऊन नागरिकांनी स्वयंस्फूर्तीने कराचा भरणा केला. मागील कित्येक वर्षांचा अनुभव मोडीत काढून नागरिकांनी कराचा भरणा केल्याची बाब भूषणावह ठरली.

भंडारा जिल्ह्यात राष्ट्रीयकृत, जिल्हा सहकारी आणि अन्य २३ बँकांच्या १५७ शाखा आहेत. या बँकेत आपआपल्या बँकेत जमा होणारी रक्कम स्टेट बँक आॅफ इंडियाच्या शाखेत जमा होत आहे. मागील दोन दिवसात किती कोटींचा व्यवहार झाला याची माहिती सध्या उपलब्ध नसून आकडेमोड होताच सांगण्यात येईल.
- विजय बागडे, मुख्य प्रबंधक,
जिल्हा अग्रणी बँक, भंडारा.