हातपंपावर पाणी आणण्यासाठी जात असलेल्या बालकाला भरधाव ट्रकने चिरडले

Bhandara News गावातील हातपंपावर पाणी आणण्यासाठी जाणाऱ्या १२ वर्षीय बालकाला भरधाव ट्रकने चिरडल्याची घटना तालुक्यातील पिंपळगाव (को.) येथे बुधवारी सायंकाळी ६ वाजताच्या सुमारास घडली. या घटनेनंतर ट्रक घटनास्थळावरुन पसार झाला.

भंडारा : गावातील हातपंपावर पाणी आणण्यासाठी जाणाऱ्या १२ वर्षीय बालकाला भरधाव ट्रकने चिरडल्याची घटना तालुक्यातील पिंपळगाव (को.) येथे बुधवारी सायंकाळी ६ वाजताच्या सुमारास घडली. या घटनेनंतर ट्रक घटनास्थळावरुन पसार झाला.

समीर देवेंद्र लांडगे (१२) रा.पिंपळगाव असे मृत बालकाचे नाव आहे. बुधवारी सायंकाळी ६ वाजताच्या सुमारास तो घरी पिण्याचे पाणी आणण्यासाठी गावातील एका हातपंपावर सायकलने जात होता. त्यावेळी अर्जुनी मोरगावकडून येणाऱ्या भरधाव ट्रकने (सीजी ०४ एचक्यू ६३९३) जोरदार धडक देत समीरला चिरडले. त्यात तो जागीच ठार झाला.

या अपघाताची माहिती होताच गावातील नागरिकांनी घटनास्थळी धाव घेतली. मात्र तोपर्यंत ट्रकचालक घटनास्थळावरुन पसार झाला. या अपघाताची माहिती लाखांदूर पोलिसांना देण्यात आली. लाखांदुरचे ठाणेदार रमाकांत कोकाटे आपल्या पथकासह घटनास्थळी पोहचले. त्यावेळी नागरिकांनी अपघाताबद्दल पोलिसांपुढे रोष व्यक्त केला. पोलिसांनी नागरिकांची समजूत काढत शवविच्छेदनासाठी मृतदेह ताब्यात घेतला. ट्रकचालकाविरुद्ध गुन्हा नोंदविण्यात आला आहे.