मित्राच्या वाढदिवसाची पार्टी जीवावर बेतली, कार झाडावर आदळल्याने दोन ठार, दोन जखमी

मित्राच्या वाढदिवसानिमित्त काेरंभी येथील हॉटेलमध्ये जेवण केल्यानंतर भंडाराकडे येत असताना अल्टो चारचाकी वाहन झाडावर जोरदार आदळले.

देवानंद नंदेश्वर

भंडारा : मित्राच्या वाढदिवसानिमित्त काेरंभी येथील हॉटेलमध्ये जेवण केल्यानंतर भंडाराकडे येत असताना अल्टो चारचाकी वाहन झाडावर जोरदार आदळले. यात दोन युवक जागीच ठार झाले. तर दोन युवक गंभीर जखमी झाले. ही घटना कोरंभी ते पिंडकेपार रस्त्यावर शुक्रवारच्या मध्यरात्री १:३० वाजताच्या सुमारास घडली.

राजेश सुनिल शिंगाडे (२०), रा. नवेगांव (अड्याळ) व प्रणय राष्ट्रपाल सुखदेवे (२३), रा. कोरंभी, अशी मृतांची नावे असून, जखमींमध्ये अक्षय रामप्रसाद कांबळे (२४), रा. आंबेडकर वॉर्ड बेला व अमर मनोहर बोरकर (२७), रा काेरंभी यांचा समावेश आहे.

याबाबत असे की, हर्षल सुखदेवे याचा वाढदिवस असल्याने मित्र राजेश शिंगाडे, प्रणय सुखदेवे, अक्षय कांबळे व अमर बोरकर हे चारही मित्र जेवनासाठी हिल साईड हॉटेल कोरंभी येथे गेले होते. दरम्यान जेवण आटोपल्यानंतर वाहन चालक हर्षल सुखदेव मित्रांना स्वगावी सोडण्यासाठी अल्टो क्र. एमएच ४० सीएच ८५१८ ने निघत असताना मित्रांनी भंडारा येथे चहा पिण्यासाठी जाण्याचा आग्रह धरला. त्यामुळे रात्री दीड वाजताच्या सुमारास कोरंभी वरुन भंडाराकडे अल्टोने येत असता चालकांचे वाहनावरुन नियंत्रण सुटले. त्यानंतर वाहन झाडावर जाेरदार आदळले. धडक एवढी जबरदस्त होती की दोघांचा जागीच मृत्यू झाला. अल्टो वाहनाच्या दर्शनी भागाचा अक्षरश: चुराडा झाला.

जखमींवर भंडारा येथील खासगी रुग्णालयात उपचार सुरु आहे. अक्षय कांबळे यांच्या तक्रारीवरुन भंडारा पोलिसांनी वाहन चालक हर्षल धर्मपाल सुखदेवे (२७) रा. कोरंभी याच्याविरुध्द भादंवि २७९, ३३७, ३३८, ३०४ (अ) तसेच मोटार वाहन कायदा सहकलम १३४, १८४ अन्वये गुन्हा नोंदविला आहे. तपास सहायक पोलिस निरिक्षक धनंजय पाटील करीत आहेत.