दोन दुचाकींची टक्कर; पाच जण गंभीर जखमी

लाखनी : परस्पर विरुद्ध दिशेने येणाऱ्या दोन दुचाकींची टक्कर होऊन पाच जण गंभीर जखमी झाल्याची घटना शनिवारी दुपारी २.४५ वाजताच्या सुमारास राष्ट्रीय महामार्गावर पिंपळगाव सडक नजीक घडली. जखमींना भंडारा येथील शासकीय रुग्णालयात उपचारासाठी दाखल करण्यात आले आहे.

रविंद्र गोपीचंद पचारे (२५), अमोल गोपीचंद दिघोरे (३३), संतोष धोंडू कुंभरे (२८), धोंडू कुंभरे (६५) आणि पंचकलाबाई धोंडू कुंभरे (६०) अशी जखमींची नावे आहेत. रविंद्र आणि अमोल हे दोघे लाखनीवरुन मुंडीपारकडे दुचाकी क्रमांक एमएच ३६ एम ६७९१ ने जात होते. तर मुंडीपार सडक येथून संतोष कुंभरे हा आपल्या आईवडीलांसह दुचाकी क्रमांक एमएच ३६ एसी ९०८६ ने येत होता. पिंपळगाव सडक ते मुंडीपार सडक दरम्यान दोन दुचाकींची जबर टक्कर झाली. पाचही जण रस्त्यावर कोसळले आणि जखमी झाले. अपघाताची माहिती होताच परिसरातील नागरिकांनी घटनास्थळी धाव घेतली. जखमींना प्रथम लाखनी व नंतर उपचारासाठी भंडारा येथील जिल्हा सामान्य रुग्णालयात दाखल करण्यात आले.