बासोरा येथे भागवत सप्ताह उत्साहात

दोन दिवस बासोरा येथे जणू भक्तिमय वातावरण निर्माण झाले होते. दत्त जयंतीचे निमित्त साधून दोन दिवसीय भागवत सप्ताहासाठी ग्रामस्थांनी एकोपा दाखवून एक आदर्श जोपासला आहे. गावात प्रत्येक अंगणामध्ये आकर्षक रांगोळी रेखाटण्यात आल्या होत्या. सडासंमार्जन तसेच ग्रामसफाईने गावाचे आकर्षण दिसून आले. या सप्ताहादरम्यान सरपंच रामदास धुमनखेडे, उपसरपंच सुधीर वाडीभस्मे, भूमेश्वर चकोले. दिलीप वाडीभस्मे, मनोज हलमारे, गणेश कांबळे, रामेश्वर वाडीभस्मे, नरेंद्र बारई आदींच्या पुढाकाराने भागवत सप्ताह यशस्वीरीत्या पार पडला.

सप्ताहात महिलांसाठी जनजागृतीपर मार्गदर्शन, फुगडी, विविध खेळांचे आयोजन करण्यात आले. या प्रत्येक कार्यक्रमामध्ये आबालवृद्धांनी हिरीरीने सहभाग घेऊन परिसरातील गावांनी आदर्श घ्यावा, असा हा उपक्रम परिसरात चर्चिला जात आहे. यावेळी नागरिकांनी मोठी गर्दी केली होती.