लग्न घरातून साडे पाच लाखांच्या दागिन्यांची चोरी

मोहाडी येथील व्यावसायिक हेमंत वासुदेव सव्वालाखे यांच्या भाच्याचे लग्न त्यांच्या घरीच आयोजित होते. गुरुवारी रात्री हळदीचा कार्यक्रम आयोजित होता. या कार्यक्रमानंतर सर्व पाहुणे मंडळी झोपी गेली. उन्हाळ्याचे दिवस असल्याने हवेसाठी दरवाजा उघडा ठेवला. ही संधी साधून चोरट्याने पाहुणे झोपलेल्या खोलीतून बॅग उघडून सोन्याची चपला कंठी ३५ ग्रॅम, सोन्याचा नेकलेस १५ ग्रॅम, सोन्याचा दुसरा नेकलेस १० ग्रॅम, सोन्याचे मंगळसूत्र १० ग्रॅम, सोन्याची अंगठी चार ग्रॅम, सोन्याचा छल्ला १० ग्रॅम, सोन्याचा दुसरा गोफ १० ग्रॅम, सोन्याची अंगठी अडीच ग्रॅम, चांदीच्या पैजण ४०० ग्रॅम, सोन्याचे दुसरे मंगळसूत्र १५ ग्रॅम, चांदीचा करदोडा व बॅगमधील ७० हजार रुपये रोख पळवून नेले. ही बॅग नवरदेवाच्या आईची होती. हा प्रकार दुसऱ्या दिवशी उघडकीस आला. त्यानंतर मोहाडी पोलीस ठाण्यात तक्रार दिली. चोरट्यांनी लग्न घरातून पाच लाख ४६ हजार रुपयांचा मुद्देमाल लंपास केला. तपास पोलीस निरीक्षक राहुल देशपांडे करीत आहेत.