चारचाकीची दुचाकीला धडक, एक जखमी

विरली (बु.) : आसगाववरून विरली (बु.) येथे येत असलेल्या दुचाकीस एका चारचाकी वाहनाने धडक दिल्यामुळे दुचाकीस्वार गंभीररीत्या जखमी झाल्याची घटना रविवारी सायंकाळी ७च्या सुमारास लाखांदूर पवनी मार्गावरील मोहरी फाट्यावर घडली.

संघर्ष श्यामराव बोरकर (२४, रा. आसगाव) असे घटनेत गंभीर जखमी झालेल्या दुचाकीस्वाराचे नांव आहे. संघर्ष काही कामानिमित्त आपल्या दुचाकीने (एमएच ३६ एसी ५५०८ ) आसगाववरून विरली बु. येथे येत होता. विरुद्ध दिशेने दारूच्या नशेत टूल्ल होऊन भरधाव वेगाने येणाऱ्या चारचाकीने (एमएच ०४ सीडी ४८४०) दुचाकीला जोरदार धडक दिली. या धडकेत दुचाकीस्वार गंभीररीत्या जखमी झाला. घटनेची माहिती कळताच पवनी पोलिसांनी तातडीने घटनास्थळ गाठून जखमी दुचाकीस्वारास प्राथमिक उपचाराकरिता आसगाव येथील प्राथमिक आरोग्य केंद्रात दाखल केले. प्राथमिक उपचारानंतर त्याला जिल्हा सामान्य रुग्णालयात हलविण्यात आले. या घटनेची नोंद पवनी पोलिसांनी घेतली असून, चारचाकी वाहन चालकाविरुद्ध गुन्हा दाखल केला आहे. पुढील तपास पवणीचे ठाणेदार जगदीश गायकवाड यांच्या मार्गदर्शनात सुरू आहे.