खैरलांजी येथे भररस्त्यात पेटला मालवाहू ऑटोरिक्षा

सहा महिन्यापूर्वी खरेदी केला होता

साकोली : सहा महिन्यापूर्वी खरेदी केलेला नवाकोरा मालवाहू ऑटोरिक्षा भररस्त्यात पेटल्याची घटना साकोलीलगतच्या खैरलांजी येथे शनिवारी सकाळी घडली.

गिरीश रहांगडाले यांच्या मालकीचा हा ऑटोरिक्षा आहे. शनिवारी साकोली नजीकच्या खैरलांजी येथील प्रशांत डोंगळे यांच्या शेतात असलेला बारदाना आणण्यासाठी ऑटोरिक्षा गेला होता. शेतात असलेला बारदाना भरण्यात आला. ऑटोरिक्षा सुरू करताना अचानक पेट घेतला. आगीने काही क्षणातच रौद्र रूप घेतले. संपूर्ण ऑटोरिक्षा आगीच्या भक्ष्यस्थानी पडला. शेतात आग विझविण्यासाठी कोणतीही उपाययोजना नव्हती. साकोलीवरून अग्निशमन दलाला पाचारण करण्यात आले. परंतु तोपर्यंत संपूर्ण ऑटोरिक्षा जळून खाक झाला होता. या घटनेची माहिती साकोली पोलिसांना देण्यात आली.

गिरीश रहांगडाले यांनी कोरोना लाॅकडाऊनच्या काळात व्यवसायासाठी सहा महिन्यापूर्वी नवीन ऑटोरिक्षा खरेदी केला होता. त्यावर त्यांच्या कुटुंबाचा गाडा चालत होता. मात्र आज बॅटरीमध्ये झालेल्या शाॅर्टसर्किटने हा मालवाहू ऑटोरिक्षा जळून खाक झाला. सात लाख रुपयाचे नुकसान झाले आहे. त्यांच्या व्यवसायावरही परिणाम होणार आहे. त्यांना मदतीची गरज आहे.