फुटाळा जंगलात गुराख्यावर बिबट्याची झडप, म्हशीमुळे वाचला त्याचा जीव

नेहमीप्रमाणे गुराखी बालचंद राऊत यांनी आपली जनावरे शुक्रवारी जंगलात चारायला नेली होती. अचानक बिबट्याने एका गायीवर हल्ला चढिवला.  बालचंदने आरडाओरडा केला असता त्याच्यावरच बिबट्याने हल्ला चढविला. त्याच वेळी एका म्हशीने बिबट्याला पळवून लावल्याने गुराख्याचे प्राण वाचले. काही जण हल्ला करणारा वाघ असल्याचे सांगतात.

लाेकमत न्यूज नेटवर्क
मोहाडी : जंगलात गुरे चारण्यासाठी गेलेल्या गुराख्यावर बिबटाने हल्ला करण्याची घटना तालुक्यातील कांद्री वनपरिक्षेत्रातील फुटाळा  (वाडा) जवळील नागदेव जंगल परिसरात शुक्रवारी दुपारी २ वाजेच्या सुमारास घडली. म्हशीने बिबट्याला पिटाळून लावल्याने गुराख्याचा जीव वाचला. जखमीवर मोहाडी ग्रामीण रुग्णालयात उपचार सुरू असून गावात भीतीचे वातावरण पसरले आहे. 
बालचंद संपत राऊत (४५), रा. फुटाळा, ता. मोहाडी असे जखमीचे नाव आहे. फुटाळा गावाचा परिसर घनदाट जंगलांनी व्यापलेला आहे. या गावात दुसरा रोजगार नसल्याने शेतीला पूरक व्यवसाय म्हणून जनावरे पालनपोषण करतात. नेहमीप्रमाणे गुराखी बालचंद राऊत यांनी आपली जनावरे शुक्रवारी जंगलात चारायला नेली होती. अचानक बिबट्याने एका गायीवर हल्ला चढिवला. 
बालचंदने आरडाओरडा केला असता त्याच्यावरच बिबट्याने हल्ला चढविला. त्याच वेळी एका म्हशीने बिबट्याला पळवून लावल्याने गुराख्याचे प्राण वाचले. काही जण हल्ला करणारा वाघ असल्याचे सांगतात. याबाबत वनविभागाशी संपर्क साधला असता बिबट असेल असा अंदाज व्यक्त केला. चौकशीअंती नेमका बिबट्या की वाघ हे कळेल, असेही सांगितले. तुर्तास गावात भीतीचे वातावरण पसरले आहे.

वनाधिकारी रुग्णालयात दाखल
- हा प्रकार माहीत होताच गावकऱ्यांनी लगेच त्याला रुग्णालयात दाखल केले. आमदार राजूभाऊ कारेमोरे, उपविभागीय अधिकारी नितीन सदगीर, वनपरिक्षेत्र अधिकारी केशव राठोड यांनी रुग्णालयात जाऊन जखमीची विचारपूस केली. सध्या त्याची प्रकृती धाेक्याबाहेर असल्याचे सांगण्यात आले आहे. बिबट्याने त्याच्या कानशिलाच्या बाजूने पंजाने जखमा केल्याचे दिसत आहे.