दुपारच्या सुट्टीत तलावावर जाणे जीवावर बेतले; विद्यार्थ्याचा बुडून मृत्यू

Bhandara News पाय घसरून पडल्याने विद्यार्थ्याचा तलावात बुडून मृत्यू झाल्याची घटना तुमसर शहराजवळील हसारा येथे मंगळवारी दुपारी २ वाजताच्या सुमारास घडली.

भंडारा : पाय घसरून पडल्याने विद्यार्थ्याचा तलावात बुडून मृत्यू झाल्याची घटना तुमसर शहराजवळील हसारा येथे मंगळवारी दुपारी २ वाजताच्या सुमारास घडली. दुपारच्या सुट्टीत मित्रांसोबत तलावावर गेला असता पाळीवरून पाय घसरून तो तलावात पडला.

देवेंद्र अजय बोंद्रे (१२) रा. हसारा, ता. तुमसर असे मृताचे नाव आहे. तो हसरा येथील जिल्हा परिषद प्राथमिक शाळेत पाचव्या वर्गात शिकत होता. मंगळवारी तो शाळेत गेला होता. दुपारच्या सुट्टीत जेवणानंतर तो मित्रांसोबत तलावाच्या पाळीवर खेळायला गेला होता. खेळताना त्याचा तलावाच्या पाळीवरून पाय घसरला आणि तलावात पडला. त्याच्या सोबत असलेल्या मित्रांनी आरडाओरड केली. त्यामुळे गावातील नागरिकांनी घटनास्थळाकडे धाव घेतली. काही वेळात त्याला गावकऱ्यांनी बाहेर काढून तुमसर येथील उपजिल्हा रुग्णालयात उपचारांसाठी आणले. मात्र डाॅक्टरांनी त्याला मृत घोषित केले.

देवेंद्रच्या मागे आई, वडील, भाऊ असा परिवार आहे. देवेंद्रचा परिवार मूळ मोहाडी तालुक्यातील निलज येथील रहिवासी असून तो आईवडिलांसह मामाच्या गावी वास्तव्याला आले होते. या घटनेने गावावर शोककळा पसरली असून तुमसर ठाण्यात आकस्मिक मृत्यूची नोंद घेण्यात आली.