नवरदेवाचा हटके अंदाज; स्वत: ट्रॅक्टर चालवत नवरीला घेऊन आला!

भूमिपुत्राने आपली वरात चक्क ट्रॅक्टरमधून काढली. एवढेच नाही तर सजविलेला ट्रॅक्टर स्वत: चालवित नवरीला गावात घेऊन आला. शेतकरी पुत्राच्या या अनोख्या वरातीचे आता तालुक्यात कौतुक होत आहे.

ठळक मुद्देसाकोली तालुक्यातील वरातीची चौफेर चर्चा

संजय साठवणे

साकोली (भंडारा) : आधुनिक काळात लग्न सोहळा म्हणजे एक प्रकारे श्रीमंतीचे प्रदर्शन ठरत आहे. कुणी कारमधून, कुणी बैलगाडीतून तर कुणी हेलिकॉप्टरमधून वरात काढतात; मात्र साकोली तालुक्यातील परसोडीच्या भूमिपुत्राने आपली वरात चक्क ट्रॅक्टरमधून काढली. एवढेच नाही तर सजविलेला ट्रॅक्टर स्वत: चालवित नवरीला गावात घेऊन आला. शेतकरी पुत्राच्या या अनोख्या वरातीचे आता तालुक्यात कौतुक होत आहे.

साकोली तालुक्यातील परसोडी येथील नागेंद्र तेजराम भाजीपाले याचा विवाह गोंदिया जिल्ह्यातील घाटबोरी येथील जयशीला झिंगरे हिच्यासोबत सोमवारी झाला. शेतकरी कुटुंबात वाढलेल्या नागेंद्रने आपली वरात ट्रॅक्टरवरून काढण्याचा निर्णय घेतला. सोमवारी सकाळी ट्रॅक्टर सजवून वरात घाटबोरी येथे पोहोचली. तेथे रितीरिवाजाप्रमाणे लग्नसोहळा पार पडला.

सायंकाळी घाटबोरीवासीयांनी नवरीला निरोप दिला. पाहुणे मंडळी गावाकडे निघायच्या तयारीत होते. तेवढ्यात नवरदेव नागेंद्रने ट्रॅक्टरचा ताबा घेत चालकाच्या सीटवर जाऊन बसला. पाठोपाठ नवरीही बाजूच्या सीटवर बसली. नवरदेव नागेंद्रने ट्रॅक्टर चालवित नवरीला घेऊन आपले परसोडी गाव गाठले. नवरदेव ट्रॅक्टर चालवित असल्याचे दृश्य पाहून सर्वच जण आश्चर्यचकित झाले. आता या लग्नाची संपूर्ण तालुक्यात चर्चा होत आहे.