मोहरणा येथे इसमाची आत्महत्या

लाखांदूर: रात्रीच्या सुमारास कुटुंबातील अन्य मंडळी झोपी गेली असताना एका ५२ वर्षीय इसमाने राहत्या घरातच गळफास घेऊन आत्महत्या केल्याची घटना घडली. सदर घटना तालुक्यातील मोहरणा येथे १७ मार्च रोजी रात्री ११ वाजताच्या सुमारास घडली. बुद्धेश्वर वरंभे असे आत्महत्या करणाऱ्या इसमाचे नाव आहे. सदर आत्महत्या ही या गावातील गत महिनाभरातील चौथी घटना आहे. यापूर्वी गत महिन्यात या गावातील दोन युवकांसह एका ७५ वर्षीय वृद्धेने गळफास घेऊन आत्महत्या केली होती. बुद्धेश्वर हे रात्रीच्या सुमारास कुटुंबीयांसह भोजन आटोपून झोपी गेले. काही दिवसापासून मानसिक तणावात वावरणाऱ्या घटनेतील मृताने कुटुंबीय झोपी गेल्याचे पाहून राहत्या घरातच गळफास घेत आत्महत्या केली. दरम्यान रात्रीच्या सुमारास कुटुंबातील एका सदस्याला जाग आली असता, बुद्धेश्वर हे गळफास घेतलेल्या अवस्थेत आढळले. लाखांदूर पोलिसांनी तात्काळ घटनास्थाळी जाऊन पंचनामा करीत मृतदेह शवविच्छेदनासाठी पाठविला. तपास येथील ठाणेदार मनोहर कोरेटी यांच्या मार्गदर्शनात पोलीस नाईक दुर्योधन वकेकारसह पोलिस अंमलदार भागवत मुंडे करीत आहेत.