सीसीटीएनएस प्रणालीत लाखांदूर पोलीस स्टेशन जिल्ह्यात अव्वल

जिल्हा पोलीस अधीक्षकांनी केला गौरव

लाखांदूर: १ जानेवारी ते ३१ डिसेंबर २०२० या कालावधीत सीसीटीएनएस प्रणालीत कोर अप्लिकेशन सॉफ्टवेअर अंतर्गत १०० टक्के नोंद पूर्ण करून लाखांदूर पोलीस स्टेशनने भंडारा जिल्ह्यात प्रथम क्रमांक मिळविला आहे. सदर क्रमांक प्राप्त केल्याने जिल्ह्याचे पोलीस अधीक्षक वसंत जाधव यांनी सदर प्रणालीची यशस्वी कामगिरी पार पाडणा-या सचिन कापगते या पोलीस अंमलदाराचा प्रशस्तिपत्र देऊन गौरव केला आहे. सदर गौरव पोलीस अधीक्षक कार्यालयात करण्यात आला.

पोलीस विभागांतर्गत ऑनलाइन प्रक्रियेचा अवलंब करून गुन्हे व गुन्हेगारांची माहिती उपलब्ध केली जात आहे. त्यानुसार येथील पोलीस ठाण्यांतर्गत गत वर्षभरात येथील पोलीस ठाण्याच्या हद्दीत घडलेल्या सर्व घटना, गुन्हे यासह अन्य गुन्ह्याच्या नोंदी सदर प्रणालीत शंभर टक्के नोंद करण्यात आली आहे. सदर कामगिरी करणारे लाखांदूर पोलीस स्टेशन जिल्ह्यात प्रथम ठरल्याने जिल्ह्याच्या पोलीस अधीक्षकांनी येथील पोलीस अंमलदाराचा प्रशस्तिपत्र व शुभेच्छांसह गौरव केला आहे. सदर गौरवाबद्दल तालुक्यातील जनतेत येथील पोलीस प्रशासनाचे कौतुक केले जात आहे.