लालपरी असुरक्षित, अग्निशमन यंत्र गायब

एसटीचा प्रवास सुरक्षित प्रवास असे ब्रीद घेऊन शहरापासून गावखेड्यापर्यंत धावणारी राज्य परिवहन महामंडळाची लालपरी खऱ्या अर्थाने लोकवाहिनी ठरली. मात्र सोयीसुविधांच्या अभावामुळे आता लालपरीतील प्रवास असुरक्षित ठरू लागला आहे. महामंडळाच्या बसेसमध्ये असलेली अग्निशमन यंत्रही बेपत्ता झाली आहेत. याकडे महामंडळाचे दुर्लक्ष असल्याने प्रवाशांची सुरक्षितता धोक्यात असल्याचे चित्र बसस्थानकामध्ये उभ्या असलेल्या बसमध्ये पाहणी केल्यानंतर दिसून आले आहे. आता काही दिवसांनी उन्हाळा सुरू होणार असून उन्हाचा पारा वाढत जाऊन आगीच्या घटनेत वाढ होते. जिल्ह्यातील सर्वाधिक नागरिक राज्य परिवहन महामंडळाच्या बसने प्रवास करतात. त्यामुळे बसमध्ये अग्निशमन यंत्रांची सुविधा आहे की नाही, याबाबत बसेसची पाहणी केली असता अनेक बसमध्ये अग्निशमन यंत्रणाच नसल्याचे दिसून आले आहे. अग्निशमन यंत्र बसविण्याकडे महामंडळाचेही दुर्लक्ष होत असल्याने प्रवासी लालपरीत आगीच्या धास्तीने प्रवास करीत असल्याचे दिसून येत आहे. त्यामुळे प्रवाशांच्या सुरक्षिततेच्या दृष्टिकोनातून अग्निशमन यंत्र बसविण्याची गरज आहे.

आगारात बसस्थानक आओ जाओ घर तुम्हारा

भंडारा येथील एसटी महामंडळाच्या बसस्थानकात लोकमत प्रतिनिधी गेले असताना कुणी हटकले नाही. येथील बसस्थानकामध्ये आओ जाओ घर तुम्हारा असाच प्रकार सुरू आहे

प्रथमोपचार पेट्या गायब

लालपरीमध्ये प्रवास करीत असताना कुठे काही अपघात झाला तर प्रवाशांसह चालक, वाहकांवर प्रथम उपचार करण्यासाठी चालकाच्या केबिनमध्ये प्रथमोपचार पेट्या बसविण्यात आल्या होत्या. त्या पेट्याही एसटी बसमधून गायब झाल्या आहेत. त्यातील साहित्य बेपत्ता झाल्याचे दिसून आले.

वायफाय सुविधा नावालाच

अँड्रॉईड मोबाईलच्या युगात राज्य परिवहन महामंडळाच्या बसमधून प्रवास करणाऱ्या प्रवाशांची मनोरंजन व्हावे, याकरिता प्रत्येक बसमध्ये वाय-फाय यंत्रणा बसविण्यात आली होती, याचा कंत्राट एका खासगी कंपनीकडे होता. परंतु वर्षभरातच यंत्रणेचा बोजवारा उडाला. बसमधीलही सुविधा बंद झाली आहे.

कोरोना नियमांची केली जाते काटेकोर अंमलबजावणी

भंडारा बसस्थानकात प्रवेश करण्यापूर्वीच तेथील सुरक्षारक्षक प्रवेशद्वारावरच तोंडाला मास्क लावा, असे आवाहन करीत आहेत. मास्क न वापरलेल्या प्रवाशांना बसस्थानकामध्ये प्रवेश दिला जात नाही.