आयुष्य लॉक, पेट्रोलची दरवाढ अनलॉक; तीस वर्षांत लीटरमागे ८३ रुपयांची दरवाढ

भंडारा : पेट्रोल व डिझेलच्या किमतीत गेल्या तीस वर्षांत लीटरमागे ८३ रुपयांची दरवाढ झाली आहे. त्यामुळे याचा परिणाम दररोजच्या महागाईवर होत असून, सर्वसामान्यांना जीवन जगताना कसरत करावी लागत आहे. गेल्या तीस वर्षांमध्ये पेट्रोल व डिझेलच्या किमतीमध्ये प्रतिलिटर दरवाढ होत तब्बल ९८.५० रुपयांची पेट्रोलमध्ये दरवाढ झाली आहे. फक्त पेट्रोलच्या किमतीतच वाढ झालेली नाही, तर डिझेलही महाग होत असल्याने वाहतूक व्यवस्थाही महागली आहे. त्याचा परिणाम भाजीपाल्याचे दर, फळांचे दर, गॅस दरवाढ, किराणा व्यवसाय या सर्वच गोष्टींवर दिसून येत आहे.

पूर्वी सरकार एक ते दीड महिन्याच्या फरकाने दरवाढ करीत होते. मात्र गेल्या काही दिवसांपासून आंतरराष्ट्रीय बाजारातील कच्च्या तेलाच्या किमती वाढल्या असल्याने तेल कंपन्यांनी प्रचंड भाववाढ केली आहे. त्यामुळे सरकारकडून प्रति लीटर पेट्रोलमागे दोन ते पाच रुपये दरवाढ केली जात आहे. दरवाढीचा निर्णय होताच सामान्य नागरिक तसेच विविध पक्षांचे कार्यकर्ते सरकारविरोधात आंदोलन करायचे. मात्र अलीकडील काही दिवसांत ही आंदोलनेही होताना दिसत नाहीत. सातत्याने होणारी भाववाढ लक्षात घेता सरकारने पेट्रोल-डिझेलच्या किमती नियंत्रणात ठेवण्याची गरज आहे. पेट्रोल व डिझेलच्या किमतींमध्ये दरवाढ होत आहे. असे असताना ग्राहकांच्या लक्षात येत नाही की, १९९१ मध्ये पेट्रोल १५.६२ रुपये लीटर होते. २००१ मध्ये पेट्रोलचे दर २९.७० रुपये लीटर, २०११ मध्ये ५९.६० रुपये लीटर तर २०२० मध्ये पेट्रोल ८१.२९ आणि डिझेल ७०.७१ रुपये लीटर होते. आता मे २०२१ मध्ये पेट्रोलचे दर ९८.९५ रुपयांवर पोहोचले आहेत. इतकी प्रचंड भाववाढ या तीस वर्षांत झाली आहे.

कोट

यापूर्वी सरकार एक ते दीड महिन्याने पेट्रोल व डिझेलची दरवाढ करीत असे. ती दरवाढ ग्राहकांना समजत होती. त्यावर तत्काळ सर्वसामान्यांसह राजकीय पक्षांचे कार्यकर्ते दरवाढ मागे घेण्यासाठी आंदोलन करीत होते. मात्र अलीकडे पेट्रोल, डिझेलच्या झालेल्या प्रचंड दरवाढीचा परिणाम महागाईवर होत आहे. त्यामुळे पुन्हा एकदा सर्वांना सायकलवरच फिरावे लागेल.

- संजय आकरे, शिवसेना विभागप्रमुख, ठाणा

कोट

डिझेलच्या किमती वाढल्याने वाहतूक व्यवसायासह बोरवेल, शेतीव्यवसायासाठी मशागतीचे दरही प्रचंड वाढले आहेत. एकीकडे पेट्रोल-डिझेलचे भाव वाढत आहेत त्यामुळे दुसरीकडे शेतकऱ्यांच्या उत्पादन खर्चात प्रचंड वाढ झाली आहे. मात्र त्या तुलनेत शेतीमालाला भाव वाढत नसल्याने शेतकऱ्यांच्या अडचणी वाढत आहेत.

- विष्णुदास हटवार, भाजप तालुका ग्रामीण महामंत्री, भंडारा

कोट

एवढी दरवाढ होत असतानाही ग्राहक मात्र संयमीच असल्याचे दिसत आहे. कोणीही सरकारविरोधात निदर्शने, आंदोलने करताना दिसून येत नाहीत. मात्र या दरवाढीचा फायदा सरकारला होत असून, सरकारने सर्वसामान्यांचे हित लक्षात घेता सातत्याने वाढणाऱ्या पेट्रोल-डिझेलच्या किमती नियंत्रणात ठेवण्याची गरज आहे. लोकांना जगण्यासाठी खूप संघर्ष करावा लागत आहे. सायकलवर फिरले तरी पेट्रोलच्या दरवाढीचा परिणाम महागाईवर झाल्याने त्याची झळ बसतेच आहे.

- दिनेश वासनिक, सामाजिक कार्यकर्ता, केसलवाडा.