सव्वापाच लाखांची दारु जप्त

दारूबंदी असलेल्या चंद्रपूर जिल्ह्यात देशी व विदेशी मद्याची बेकायदेशीर वाहतूक करणाऱ्या एका वाहनाला पकडून तीन आरोपींच्या त्यांच्या ताब्यातून ५ लाख २३ हजार ४४८ रूपयांची दारू जप्त करण्यात आली.

तिघांना अटक : नववर्षाच्या पर्वावर उत्पादन शुल्क विभागाची कारवाई
भंडारा : दारूबंदी असलेल्या चंद्रपूर जिल्ह्यात देशी व विदेशी मद्याची बेकायदेशीर वाहतूक करणाऱ्या एका वाहनाला पकडून तीन आरोपींच्या त्यांच्या ताब्यातून ५ लाख २३ हजार ४४८ रूपयांची दारू जप्त करण्यात आली. गोपनीय माहितीच्या आधारावरून राज्य उत्पादन शुल्क विभागाच्या अधिकाऱ्यांनी ही कारवाई मध्यरात्रीच्या सुमारास पवनी-चंद्रपूर मार्गावर केली.
याप्रकरणी योगेश्वर नानाजी गहाणे रा.वाढोणा (ता.नागभिड), विकास सुधाकर गेडाम रा.सिरपूर (ता.चिमूर) व खुशाल नारायण हटवार रा.तेलीमेंढा (ता.नागभिड) असे अटक करण्यात आलेल्या आरोपींची नावे आहेत. हे तिघेही चारचाकी वाहन एम.पी. २३ डी ८६६९ ने बेकायदेशीररीत्या देशी व विदेशी मद्य घेऊन चंद्रपूर जिल्ह्यात जात होते. याची माहिती राज्य उत्पादन शुल्क विभागाला मिळाली.
त्या माहितीवरुन उत्पादन शुल्क विभागाचे अधीक्षक नितीन धार्मिक यांच्या नेतृत्वात दुय्यम निरीक्षक आर.आर. उरकुडे व त्यांच्या सहकाऱ्यांनी वाहनाला अडवून कारवाई केली. या तीन आरोपींना न्यायालयाने एक दिवसांची पोलीस कोठडी मंजूर केली आहे.
खुशाल हटवारला ८ जानेवारीपर्यंत न्यायालयीन कोठडी सुनावली आहे. ही कारवाई उत्पादन शुल्क विभागाचे दुय्यम निरीक्षक एन.एस. धुरड, व्ही.जे. माटे, जे.ए. अंबुले, एन.जी. कांबळे आर.आर. उरकुडे यांच्यासह विभागाच्या धाड पथकातील कर्मचाऱ्यांनी केली. (प्रतिनिधी)