मोटारसायकल पुलावरून कोसळली, दोन तरुण ठार

तुमसर (भंडारा) : भरधाव मोटारसायकल अनियंत्रित होऊन पुलावरून नाल्यात कोसळून दोन तरुण जागीच ठार झाले. ही घटना तुमसर तालुक्यातील खैरलांजी शिवारात बुधवारी सकाळी उघडकीस आली. मंगळवारी रात्री हा अपघात झाल्यानंतर रात्रभर दोघेही नाल्यातच पडून राहिले. सुनसान रस्ता असल्याने मदत मिळाली नाही आणि त्यातच त्यांचा प्राण गेला.

समीर राऊत (२२, रा. पिलीनदी नागपूर) आणि संगीत चौधरी (२०, रा. छतेरा - मध्य प्रदेश) अशी मृतांची नावे आहेत. मध्य प्रदेशातील छतेरा येथे आजीला भेटण्यासाठी समीर आणि संगीत नागपूरवरून दुचाकीने (एमएच४० बीएस ६०४०) जात होते. मंगळवारी रात्री तुमसर तालुक्यातील खैरलांजी शिवारातील पुलावरून दुचाकी नाल्यात कोसळली. खाली असलेल्या दगडावर दोन्ही तरुण पडले. रस्ता सुनसान असल्याने अपघात झाल्याचे कुणाच्याही लक्षात आले नाही. बुधवारी सकाळी हा अपघात उघडकीस आला. मात्र तोपर्यंत दोघांचाही मृत्यू झालेला होता. अपघाताची माहिती मिळताच तुमसर पोलिसांनी घटनास्थळी धाव घेतली. पोलीस उपनिरीक्षक विलास करंगामी यांनी पंचनामा केला. घटनास्थळी बघ्यांची मोठी गर्दी झाली होती. जुन्या पुलावर कठडा नसल्याने हा अपघात झाल्याचे सांगण्यात येत आहे.