म्युकरमायकोसिस संपर्कामुळे होत नाही, जिल्ह्यात पाच रुग्ण

भंडारा : कोरोना महामारीच्या दुसऱ्या लाटेत म्युकरमायकोसिस (ब्लॅक फंगस) हा आजार उद्‌भवत आहे. जिल्ह्यात या आजाराचे पाच रुग्ण आढळले असून त्यांच्यावर उपचार सुरू आहेत. हा आजार संपर्कामुळे होत नसल्याचेही तज्ज्ञांनी म्हटले आहे, मात्र कोविड नियमांचे पालन करणेही गरजेचे असल्याचे मत त्यांनी व्यक्त केले आहे.

कोरोना महामारीसोबतच अन्य आजारही समोर येत आहेत. त्यात म्युकरमायकोसिस हा आजार आता सतावत आहे. हा आजार रुग्णाच्या संपर्कात आल्यामुळे होत नाही, तर स्वतःची बेफिकिरी आणि नियमांचे पालन न करणे, यामुळे होऊ शकतो. एखाद्या व्यक्तीला मधुमेह असल्यास व त्याची रोगप्रतिकारक क्षमता कमी असल्यास व त्याच स्थितीत तो नियमांचे पालन न करता रुग्णाच्या संपर्कात आल्यास त्याला आजार उद्‌भवू शकतो. मात्र मधुमेह व प्रतिकारक्षमता कमी असल्यास त्यालाही हा आजार होऊ शकतो. अशा स्थितीत काळजी आणि फक्त काळजी हेच त्यावर रामबाण औषध आहे. याशिवाय डॉक्टरांचा सल्ला वेळेवर घेऊन त्यावर औषधोपचार करणे अत्यंत महत्त्वाचे आहे. वैद्यकीय तज्ज्ञांनी, म्युकरमायकोसिस याला हलक्यात न घेता त्याबाबत काळजी घेण्याचे आवाहनही केले आहे.

बॉक्स

औषधांचा पुरेसा साठा

भंडारा जिल्हा रुग्णालयात म्युकरमायकोसिसचे तीन रुग्ण उपचार घेत असून अन्य दोन रुग्ण खासगी रुग्णालयात उपचार घेत आहेत. या आजारावर प्रभावी असलेली इंजेक्शन्स जिल्हा रुग्णालयात उपलब्ध आहेत. औषधींची कमतरता नसल्याचेही वैद्यकीय सूत्रांनी सांगितले. म्युकरमायकोसिसचे रुग्ण वाढल्यास त्याअनुषंगाने औषधेही उपलब्ध करून देण्यात येत आहेत. जेणेकरून भविष्यात औषधांबाबतीत टंचाई उद्भवू नये म्हणून जिल्हा आरोग्य प्रशासन त्या दिशेने पाऊल टाकत आहे.

बॉक्स

ही घ्या काळजी...

रक्तातील साखरेवर काटेकोर नियंत्रण ठेवावे, सोबतच कान, नाक, घसा, नेत्र व दंतरोगतज्ज्ञ यांच्याकडून एक आठवड्यानंतर तपासणी करावी, लक्षणे आढळल्यास डॉक्टरांशी त्वरित संपर्क साधावा.

बॉक्स

म्युकरमायकोसिसची प्राथमिक लक्षणे...

या आजारात चेहऱ्याचे स्नायू दुखणे, चेहऱ्यावर बधीरपणा येणे, नाकावर सूज येणे, नाकपुडीतून रक्तस्त्राव, काळपट स्त्राव वाहणे, चेहरा अथवा डोळ्यावर सूज येणे, एक पापणी अर्धी बंद राहणे, डोळा दुखणे, वरच्या जबड्याचे दात दुखणे किंवा हलू लागणे, अस्पष्ट दिसणे, ताप येणे अशी लक्षणे दिसू लागतात.

बॉक्स

डॉक्टर काय म्हणतात...

ज्या व्यक्तीला मधुमेह व त्याची रोगप्रतिकारक क्षमता कमी आहे, अशांना म्युकरमायकोसिसचा संसर्ग होऊ शकतो. त्यांनी कोविड १९ नियमांचे पालन करणे अत्यंत आवश्यक आहे. मात्र घाबरून जाण्याचे कुठलेही कारण नाही.

डॉ. नितीन तुरस्कर, भंडारा

जिल्हा रुग्णालयात म्युकरमायकोसिस या आजाराबाबत औषधे उपलब्ध आहेत. इंजेक्शन्ससुद्धा उपलब्ध असून नागरिकांनी लक्षणे दिसल्यास डॉक्टरांशी त्वरित संपर्क साधावा. उपचार हेच त्यावरील योग्य निदान आहे.

- डॉ. निखिल डोकरीमारे, भंडारा.

रुग्णांना लक्षणे आढळल्यास त्वरित डॉक्टरांचा सल्ला तर घ्यावाच, सोबतच कान, नाक, घसा व डोळ्यांची तपासणी करून घ्यावी. जेणेकरून वेळीच औषधोपचार करून सुरक्षित राहता येईल.

- डॉ. प्रमोद धुर्वे, भंडारा