पालांदूर येथे रात्रकालीन क्रिकेट स्पर्धा उत्साहात

पालांदूर : कोरोना संकटाने क्रिकेट स्पर्धेसह इतरही मैदानी खेळ प्रभावित झाले असताना पालांदूर येथे तरुणांच्या उत्स्फूर्त सहभागाने रात्रकालीन टेनिस बॉल क्रिकेट सामने उत्साही वातावरणात गोविंद विद्यालयाच्या क्रीडांगणावर पार पडले. नऊ दिवस चाललेल्या या क्रिकेट स्पर्धेत प्रथम बक्षिसाचा मानकरी गुरढा येथील क्रिकेट संघ ठरला आहे. द्वितीय अड्याळ संघाला मिळालेला आहे. इतर बक्षिसामध्ये मॅन ऑफ द सिरीज ईश्वर साखरकर गुरढा, मॅन ऑफ द मॅच चेतन इसापुरे अड्याळ यांनी जिंकला. बक्षीस वितरण सरपंच पंकज रामटेके, उपसरपंच स्वप्निल खंडाईत (कवलेवाडा) यांच्या उपस्थितीत पार पडले. रात्रकालीन टेनिस बॉल क्रिकेट सामन्यात एकूण ५५ संघांनी हजेरी लावली. क्रिकेट सामने नऊ दिवस चालले. थंडीतही तरुणाईचा उत्स्फूर्त सहभाग क्रिकेट सामन्यात अनुभवायला मिळाला. भंडारा जिल्ह्यासह शेजारच्या इतरही जिल्ह्यांतून क्रिकेट संघाने हजेरी लावली होती.

बऱ्याच वर्षांनंतर पालांदूर येथे क्रिकेट सामने खेळण्यात आले. मैदानाची कमतरता असल्याने तरुणाईचा क्रिकेट खेळण्याकरिता हिरमोड होत आहे. पालांदूर येथे गोविंद विद्यालयाचे, पोलीस ठाण्याचे मैदान तरुणांना आकर्षित करीत आहे. या मैदानांना आणखी सेवा पुरवीत सुसज्ज करण्याची गरज आहे.

राज्य सरकारने जिल्ह्यातील दुरवस्थेत असलेले क्रीडांगण दुरुस्त करण्याकडे लक्ष पुरविणे नितांत गरजेचे झाले आहे. तरुणाई मोबाईलच्या जमान्यात मातीतील खेळाकडे दुर्लक्ष करीत आहे. त्यांना आपल्या मूळ मातीशी एकनिष्ठ ठेवण्याकरिता जुने असलेले क्रीडांगण नव्याने अत्याधुनिक सेवा-सुविधा पुरवीत सुसज्ज करणे काळाची गरज झालेली आहे.

क्रिकेट सामन्याला श्याम चौधरी, अली मोहम्मद लद्दानी, विक्की यावलकर, सागर बोरकर, उमंग गायधनी, नितीन धकाते, आशिष सेलोटे, उमेर लद्यानी, पिंटू खंडाईत, पंकज रामटेके, अविनाश बावणे, अमोल पडोळे, सागर वंजारी, शुभम प्रधान, दिनेश तिजारे, अंकित राऊत ,देवेश नवखरे, नीरज किदरले, देवानंद लांजेवार, अनुप खंडाईत, वसंता धकाते, आदी पीएमसीएल क्रिकेट मंडळाच्या तरुणांनी सहकार्य केले.

फोटो